Шығыс Қазақстан облысының әкімі Даниал Кенжетайұлы Ахметов жұмыс барысымен Үржар ауданында болды.
Облыс басшысы алдымен аудан орталығындағы әуежайдың ұшу-қону алаңының ені мен ұзындығын кеңейтуге байланысты атқарылып жатқан жұмыстармен танысты. 19 сәуірден бастап Үржардағы әуежай қалпына келтіру жұмыстарына байланысты жабылады, ал туристер үшін теміржол және автобус рейстерінің саны артады.
Құрылыс жұмыстары үш ауысымда, яғни, бір мезетте терминалда, басқа ғимараттарда және ұшу-қону жолағында жүргізіледі.
Бастапқыда әуе қатынасын үзбеу үшін уақытша қону жолағын салу ұсынылған. Алайда оның құны 5,6 млрд. теңгені құрағандықтан, бұл жоба іске аспады. Осы күнгі кездесу барысында Азаматтық авиация комитетінің төрағасы әуежай ғимаратын қайта жөндеуге көмек ретінде мамандар жіберетінін жеткізді.
Даниал Кенжетайұлы әрі қарай Мақаншы ауылына жол тартты. Мақаншы – бұрынғы аудан орталықтарын дамытудың жаңа бағдарламасына енген 16 ауылдың бірі.
Аймақ басшысы мұнда күрделі жөндеуден өткен 140 орынға арналған балабақша ғимаратында болды. Мекеменің материалдық-техникалық жағдайын және жалпы дайындық жұмыстарын қарап, оң бағасын берді. Балабақшада бүлдіршіндер үшін барлық қолайлы жағдай жасалған.
Даниал Кенжетайұлы осыдан соң ауылдағы жөндеуден өткен 60 орынға шақталған жұқпалы аурулар бөлімшесінің жұмысымен танысты. Бұл ғимарат 7 жылдан астам уақыт бос тұрған еді. Қазір мұнда оттегі станциясы, реанимациялық палаталар және дәрігерлерге арналған уақытша жатақхана бар.
Көптеген жылдар бойы аурухананың жанында тағы бір корпус бос тұр. Оны жақын арада жөндеп, күндізгі стационары бар емдеу-дәрігерлік амбулатория ашу жоспарланып отыр. Айта кетейік, бұл аурухана 15 мың мақаншылықтан бөлек жақын маңдағы 16 ауыл тұрғындарына да қызмет көрсетеді.
Одан бөлек, биыл қараша айына дейін Мақаншыдағы су құбыры құрылысы аяқталып, ауыл тұрғындары сапалы ауыз сумен толық қамтамасыз етілмек.
Даниал Кенжетайұлы Үржар аудандық орталық ауруханасына да соғып, 2020 жылы аудандық орталық ауруханада атқарылған бірқатар жұмыстармен танысты. Ауруханадағы рентген, компьютерлік томография кабинеттерін көрді.
– Үржардағы аудандық аурухана туристік маусымның ашылуына дайын деп сеніммен айта аламыз. Бүгінде мұнда оттегі станциясы мен ПТР-зертхана бар. Компьютерлік томограф және рентген-аппараты орнатылып, күрделі нейрохирургиялық операциялар жүргізілуде. Үржар аудандық ауруханасының мамандары Израиль, Литва және Ұлыбритания клиникаларында оқудан және практикадан өтті. Жалпы, қызметкерлердің біліктілігін арттыру бойынша жұмыстар одан әрі жалғасады,- деді облыс басшысы Даниал Ахметов.
Даниал Кенжетайұлы сапар соңында аурухана ұжымына зор денсаулық тілеп, жұмысқа жауапкершілікпен қарауға шақырды.
Аяжан БИЯХМЕТОВА, «Семей таңы»
