Семей қаласында 2021 жылдың қаңтар айынан 22 сәуіріне дейін ПТР тесті оң нәтиже берген 246 оқушы анықталды. Оның 104-і кезекші топтарда оқыса, 142-сі қашықтықтан білім алған.
Қазіргі уақытта 41 бала карантинде. Оларда инфекция симптомсыз өтуде. Барлығы амбулаториялық ем қабылдап жатыр.
Эпидемиологиялық зерттеулерге сәйкес, балалардың оқу және тұрғылықты мекен-жайлары бойынша себеп-салдарлық қатынастар анықталған жоқ. Инфекция жұқтыру көздері — ата-аналары мен жақын туыстары.
21 наурызда оқушылар арасында КВИ-дің 18 жағдайы тіркелген еді. Бұл сәуір айының осы кезеңімен салыстырғанда 4 есе аз (67 оқушы).
Мамандар қала тұрғындары арасында КВИ инфекциясының таралуының өсуін карантиндік шаралардың әлсіреуімен, маска режимінің, әлеуметтік дистанцияның және қосымша білім беретін жеке мекемелерде шектеу режимінің сақталмауымен байланыстырады.
ҚР СЭБ комитеті ШҚО СЭБ департаменті Семей қалалық СЭК басқармасы Қаулысы негізінде 18 мектеп карантинге жабылды — №№ 7, 10, 11, 17, 18, 19, 22, 28, 30, 32, 33, 35, 38, 40, 43, 49 орта мектептері, Аймауытов атындағы орта мектеп және №37 гимназия.
Коронавирустық инфекцияның таралуын болдырмау үшін барлық білім беру мекемелерінде ата-аналар жиналысы өткізілді. Қажет болған жағдайда ата-аналар мен балалар онлайн режимінде, әртүрлі мессенджерлер арқылы кеңес алады. Участок бойынша рейдтер өткізіліп, балалардың жағдайы күн сайын бақылануда.
Қыркүйек айынан бастап 522 оқушының (қала мектеп оқушыларының жалпы санының 1%-ы) ПТР тесті оң нәтие көрсетті. Олардың 357-сі қашықтықтан оқыған. 5 бала ауруханада емделсе, қалғандарында сырқат симптомсыз өткен.
Облыс бойынша оқушылар арасындағы КВИ-мен сырқаттанушылық Семей қаласында көп тіркеліп отыр.
Айтолқын Саматова, «Семей таңы»
