Апта сәрсенбісінде Семей қаласының әкімі Нұрымбет Сақтағанов шаһар ішіндегі жол жөндеу жұмыстарының барысымен танысу мақсатында қала көшелерін аралап шықты.
Жалпы, қазіргі таңда қаладағы жолдардың жалпы ұзындығы 756 шақырымды құрайды, оның 291 шақырымы- бетондық-асфальт жабындысы, 23 шақырымы — қиыршық тас, 442 шақырымы топырақ жабындысы бар жолдар.
Осыған дейін шаһар басшысы биылғы жылы 451 млн теңгеге 15 мың шаршы метрден астам жол аумағына ағымдағы және жалпы ұзындығы 6,92 км болатын қаланың тоғыз көшесіне орташа жөндеу жұмыстары жүргізілетінін айтқан болады. Атап айтсақ, Шәкәрім даңғылының Алтай көшесінен Морозов көшесіне дейінгі аумағы, Грязнов, Кордонная, 3-ші проезд, Севастополь, Синицин, Стальский және Елемесов көшелері жөнделетін болады.
Сонымен қатар жақын арада Қарағайлы шағын ауданында жалпы құны 1,2 млрд теңгені құрайтын жаңа жеті көшенің құрылысы басталмақ. Бұдан бөлек, Ұшақтар, Водный, Восход, Комсомол, Степной, Ақсай аудандарында тас-қиыршық материалын төсеу арқылы жол жүру жолағын жоспарлау жұмыстары қолға алынды. Аталмыш бағыттағы жұмыстардың межелі мерзім ішінде аяқталуын және сапалы жүргізілуін қамтамасыз ету үшін жергілікті атқарушы билік тарапынан бақылау-қадағалау болуы қажет.
Жол жөндеу жұмыстары жүріп жатқан көшелерді аралау барысында Нұрымбет Аманұлы мердігер компания өкілдерімен тілдесіп, жолдың сапалы жөнделуіне маңыз беруді тапсырды. Қазіргі таңда барлық жұмыстар кедергісіз атқарылып жатыр. Жұмыс күші де, қажетті материал да жеткілікті.
Сөз орайында айта кетер болсақ, қазіргі таңда қалалық әкімдік тарапынан биылғы жылға 1,1 млрд теңгеге жолдарды орташа жөндеу жұмыстарына қосымша қаржы бөлу мәселесі қаралуда, тиісті сметалық құжаттар әзірленген.
— Жалпы, қазіргі таңда қала жолдарының 78%-ы қанағаттанарлық деңгейде деп есептеледі, біздің алдымызда 2025 жылға дейін бұл көрсеткішті 90%-ға дейін жеткізу міндеті тұр. Жүргізіліп жатқан жұмыстар барысында жолдың сапасына ерекше назар аударылады. Жолдардың сапасы жөніндегі ұлттық орталықпен келісім бар, мекеме құрылыс, жөндеу жұмыстарының сапасын тұрақты бақылауда ұстайтын болады, — дейді қала басшысы Нұрымбет Аманұлы.
Абылай Мақсұтбек, «Семей таңы»
