Өткен жұма, 14 мамыр күні ШҚО әкімі Даниал Ахметов Көкпекті ауданына іссапармен барып, «Елім-ай» шаруа қожалығында болды. Қожалықтағы бес мың басқа арналған қазіргі заманғы бордақылау алаңының, ветеринариялық өткізу пункті мен құрама жем цехының жұмысымен танысты.
«Елім-ай» — облысымыздағы ғана емес, еліміздегі ең ірі шаруашылықтардың бірі. Ірі-қара мал басын өсіру бойынша республика көлемінде үшінші орында тұр. Қожалық мал шаруашылығын, оның ішінде ет бағытын тиімді дамытып келеді. Мұнда бес мыңға жуық қазақтың ақбас ірі қарасы, халық арасында «қара маржан» аталып кеткен «Black Angus» тұқымы өсіріледі. Агрокешен оларды будандастырып, ерекше тұқым түрін алуда.
» Мұнда ең үздік әлемдік технологиялар енгізілуде. Егін шаруашылығы да айтарлықтай тиімді дамып келеді. Қысқа уақыт ішінде 1,5 мың га аумақ тамшылап суаруға дайындалды. Озық технологиялар негізінде жемшөп базасы қалыптасты. Суға арналған жинақтаушы канал салынуда. Бірқатар технологияны енгізуде уақытша қиындықтар бар. Біз оны шешуге көмектесеміз», — деп жазды Даниал Ахметов фейсбук әлеуметтік желісіндегі парақшасында.
Шаруашылық 150 шағын фермерді біріктірді. Бұл шағын шаруашылықтарды, ет кластерін дамытуға арналған маңызды жоба.
Қожалық басшысы Болат Бекбердинов бордақы алаңындағы мал басының санын 30 мыңға жеткізуді, облысымыздың шаруаларынан мал сатып алуды жоспарлап отыр. Бұл орайда заманауи бордақы алаңы салынды. Алдағы уақытта «Елім-ай» шаруа қожалығы әлемдік нарыққа шығу үшін халықаралық сертификат алмақшы.
