Облыс жаңалығы
Облыс әкімі Даниал Ахметов Азия чемпионатында әйелдер арасында жеңіске жеткен «Алтай» волейбол клубы мүшелерімен кездесіп, спортшылар мен жаттықтырушыларын құттықтады. Бұл туралы аймақ басшысы өзінің инстаграм әлеуметтік желідегі жеке парақшасында жазды.
«Алты жыл бұрын біз осы клубты құрдық, расында, волейболшыларымыздың осындай мықты нәтижелерге қол жеткізе алатындығына көбі күдікпен қарады, бірақ бүгінде біз мүмкін емес ештеңе жоқтығын дәлелдедік»,- деп жазды Даниал Кенжетайұлы.
Жаттығуларда төккен тер еш уақытта зая кетпейтіні белгілі. Қазір клуб Қазақстан чемпионатында лайықты өнер көрсетіп қана қоймай, 2024 жылы өтетін Олимпиадада мықты ойын өрнегін көрсетіп, әлемнің ең үздік клубтарының үштігіне кіруді басты мақсат етіп қойып отыр.
Даниал Кенжетайұлы: «Бастысы, алдыға қойған асқақ мақсаттардан жасқанбай, керісінше, оған жетудің жолдарын қарастырудан тайынбау қажет»,- дейді.
«Команда ауысымының өсіп келе жатқаны қуантады, екінші «Алтай» командасы да қазақстандық жарыстарда өздерін көрсетуге сақадай сай. Семей қаласында клуб ұйымдастыру туралы шешім қабылданды, өйткені волейбол өте танымал және көптеген азаматтардың қызығушылығына ие спорт түрі»,- деп жазды облыс басшысы.
Облыс басшысы Қазақстан Президенті Қасым-Жомарт Тоқаев Спорт министріне «Алтай» командасындағы қыздарға спорттық атақтар беруді тапсырғанын қуанышпен жеткізді.
