Барыс жылының басында Жаңаөзенде газдың қымбаттауына байланысты басталған бейбіт шеру Қазақстанның басқа қалаларында, әсіресе, Алматыда жаппай тәртіпсіздікке, лаңкестікке ұласып, көптеген адам шығынына әкеліп соқты. Шерудің алғашқы күндері Президентіміз Қасым-Жомарт Кемелұлы халыққа оқ атуға тыйым салып, рұқсат бермеді. Ал содырлар (шет елдерден келген және өз ішіміздегі) болса әскерилер мен полиция қызеткерлерін, қарапайым халықты ұрып-соғып, өлтіруге көшті. Міне, сол кезде ғана Президент шұғыл және батыл шешім қабылдап, әскерилер мен тәртіп сақшыларына қару қолданып, содырларды ескертусіз атуға бұйрық берді. Осындай батыл шешімнің арқасында лаңкестердің жолы кесілді. Еліміздегі жағдайдың ушығуына байланысты Мемлекет басшысы Қазақстан мүше болып табылатын ҰҚШҰ-дан көмек сұрады. Президенттің бұл шешімін де қолдаймыз.
Қасым-Жомарт Кемелұлы халыққа бірнеше үндеу жасап, осындай қиын кезеңде елмен, халықпен бірге болатынын мәлімдеді. Мемлекет басшысының батыл шешімдер қабылдауының нәтижесінде еліміздегі жағдай тұрақталып келеді.
Президент өзінің халыққа арнаған үндеулерінде елімізде болған лаңкестік оқиға жан-жақты зерттеліп, тексерілетінін, кінәлі адамдар жазаланатынын, күштік құрылымдар мен олар пайдаланатын құралдар жетілдірілетінін, жалпы, елімізді реформалау туралы өзінің платформасын ұсынатынын айтты.
Елімізде жарияланған төтенше жағдайға байланысты облыста және ауданымызда арнайы штабтар құрылып, жұмыс істеуде. Тарбағатай аудандық штабының бастығы – аудан әкімі Асхат Смаилов бөлім, мекеме басшыларын, құқық қорғау органдары, үкіметтік емес ұйымдар мен қоғамдық ұйымдардың басшыларын бірнеше рет жинап, төтенше жағдайға байланысты тапсырмалар берді. Аудандағы жағдайды толық бақылауда ұстап отыр. Құқық қорғау органдары мен мекемелер, ауыл әкімдері, ерікті жасақшылар тобы тәулік бойы кезекшілік атқаруда. Бұл біздің амандығымыз үшін, еліміздегі тұрақтылықты сақтау үшін қажет.
Ел болып Мемлекет басшысына қолдау көрсетейік!
Ержан ҚҰТТЫБАЕВ,
Қазақстан Журналистер одағының мүшесі,
ҚР білім беру ісінің үздігі
