#БізБіргеміз
Мемлекет басшысы Қасым-Жомарт Кемелұлы Тоқаевтың биылғы 11 қаңтарда ҚР Парламенті Мәжілісінің отырысында берген тапсырмасына сәйкес Қазақстанның бірнеше қоғамдық ұйымы құрған «Қазақстан халқына» қоғамдық әлеуметтік қорының (ҚӘҚ) Қамқоршылық кеңесінің құрамы сайланды. Бұл туралы Үкіметтің баспасөз қызметі хабарлады.
Атап айтсақ, «Қазақстан халқына» қорын Болат Жәмішев басқаратын болды. Қамқоршылық кеңес құрамына белгілі мемлекет және қоғам қайраткерлері, азаматтық қоғам өкілдері, меценаттар мен еліміздің беделді азаматтары кірді.
Қамқоршылық кеңес құрамында «University Medical Center» КҚ басқарма төрағасы Пя Юрий Владимирович, Қамқоршылық кеңесінің төрағасы; ҚР бала құқықтары жөніндегі уәкіл Аружан Саин бар. Сонымен қатар, өзге де көптеген қоғам қайраткерлері, экономистер мен меценат азаматтар бар.
Еске сала кетейік, қоғамдық әлеуметтік қордың Бақылаушылар кеңесіне денсаулық сақтау мен білім беру салаларының белгілі қайраткерлері, сондай-ақ ҚР қоғамдық бірлестіктерінің өкілдері кірген. «Қазақстан халқына» ҚӘҚ денсаулық сақтау, білім беру, халықтың әлеуметтік жағынан аз қамтылған топтарын әлеуметтік қолдау саласындағы нақты проблемаларды шешумен айналысатын болады. Қордың қызметі қоғамды біріктіруге және әлеуметтік әділеттілікті нығайтуға ықпал етеді. Қор жеке және мемлекеттік көздерден қаржыландырылады, сонымен қатар халықаралық қайырымдылық ұйымдарының көмегін тарту жоспарда бар»,- делінген primeminister.kz баспасөз қызметі таратқан ақпаратта.
Ал қазіргі таңда аталмыш қорға еліміздегі іргелі өнеркәсіп орындары, банктер, кәсіпкерлер қомақты көлемде қаржы аударуда.
«СТ» — ақпарат
