Бейсенбі, 13 қаңтар күні қала әкімі Бақытжан Байахметов жанар-жағармай және әлеуметтік азық-түлік бағасын реттеу бойынша кеңес өткізді.
Бүгінде қалада әлеуметтік нан мен жанар-жағармай жеткізу бойынша жағдай тұрақты. Қалада 30-дан астам нан өндіруші тұрақты жұмыс істейді. Олардың ішінде ең ірілері: «СемНан», «Тұмар» ЖШС және басқалары. «СемНан» күн сайын дүкендерге 110 теңгеден үш жарым мың бөлке әлеуметтік нан жеткізеді. Әкімдік сауда нүктелерімен жасаған меморандумға сәйкес, дүкендер нан үшін 5 теңгеден аспайтын үстемақы қосады. Нәтижесінде, аталған өндірушіден алынған нанның құны 115 теңгеден сатылады. Ал өзінің жеке наубайханалары бар «Апрель», «Адал» сияқты ірі супермаркеттерде нан бағасы одан сәл арзан. Оларда нан 95-100 теңге аралығында.
— Менің жеке парақшама тұрғындар нан жеткізу және газ, бензин, дизель отынының бағасы бойынша көптеген сұрақтар жазады. Бүгінде Семейде ұн тарту комбинаттары мен цехтары тұрақты жұмыс істейді. Бұл қаламызға сырттан нан әкелмеуге мүмкіндік береді. Әкімдіктің арнайы жұмыс тобы ұн мен нан бағасының құрамдас бөлігін есептеді. 38 пайыз — бұл жанар-жағармай шығындары, 18 пайыз — электр энергиясы. Оған қоса салықтар мен жұмысшылардың жалақысы бар. Мемлекеттік қолдау шаралары қазіргі бағаларды ұстап қана қоймай, олардың біршама төмендеуіне қол жеткізуге мүмкіндік береді, — деді Семей қаласының әкімі Бақытжан Байахметов.
Мемлекеттік реттеу аясында жанар-жағармай бағасы да тұрақтанды. Автожанармай құю желісінде «Гелиос», «Авантаж» және басқа да компаниялар А-92 маркалы бензинді литріне 177-180 теңге аралығында сатады. Газ — 60 теңге. Дизель отыны бағасының да айтарлықтай төмендеуі байқалады. Егер біраз уақыт бұрын оның құны 300 теңгеден асып кетсе, қазір — 260 теңге.
— Қазақстан Президенті Қасым-Жомарт Кемелұлы Тоқаев өз сөзінде осы қиын-қыстау кезеңде отандастарымызға көрсетілетін мемлекеттік қолдау шаралары туралы айтты. Бұл шешім — уақытылы әрі дұрыс. Сондықтан жергілікті атқарушы биліктің міндеті — Мемлекет басшысы мен үкіметтің барлық тапсырмаларын дәл әрі тиімді орындау,- деді қала әкімі Бақытжан Байахметов.
Қала әкімі өз сөзінде қабылданған шаралардың нәтижесінде, тұрмыстық газ бағасы да төмендегенін атап өтті. 25 литрлік тұрмыстық газ қазір 1700-2500 теңге аралығында сатылуда. Ал 50 литрлік газ сыйымдылығының бағасы 5 мыңнан 3400 теңгеге дейін төмендеді.
Бақытжан Байахметов барлық жергілікті өндірушілерге семейліктерге қолдау көрсеткені үшін алғыс айтып, әкімдіктің тиісті бөлімдеріне шағын және орта бизнестің тиімді жұмыс істеуіне барлық жағдайды жасауды тапсырды.
Сондай-ақ қала әкімінің тапсырмасы бойынша жақын арада тұрақтандыру қорының өнімдері саудаланатын дүкендер мен сауда нүктелерінің желісі кеңейтілетін болады. Айта кетейік, тұрақтандыру қорының өнімдері базар бағасынан төмен.
Семей қалалық ішкі саясат бөлімі
