Өткен жұмада облыс әкімі Даниал Ахметов шағын және орта бизнес өкілдерімен, атап айтқанда қоғамдық тамақтану саласындағы кәсіпкерлермен кездесті.
Қазақстан Президенті Қасым-Жомарт Кемелұлы Тоқаев шағын және орта бизнес секторына қатысты қатаң карантиндік шектеулерді қайта қарауды тапсырған болатын. Осыған орай аймақ басшысы Даниал Кенжетайұлы облыстағы шектеу шараларын кезең-кезеңімен жеңілдетуді қолға алды. Облыс әкімі дәмханаларда, асхана мен мейрамханаларда, караоке-барларда, түнгі клубтарда, бильярд және банкет залдарында жұмыс уақыты бойынша шектеулер болмайтынын айтты. Тек толымдылығы бойынша 50 пайыздан аспауы қажет. Жаппай отбасылық іс-шараларда жүз адамнан, клубтарда жетпіс және караокеде елу адамнан артық болмауы шарт.
Кеңес барысында бизнес өкілдері барлық қызметкерлер екпе алғанын, ғимаратқа кіргізу Ashyq қосымшасының «жасыл» мәртебесі бойынша ғана жүргізілетінін айтты. Діни нысандардағы халықтың сыйымдылығы да елу пайыздан аспауы тиіс. Бұл жеңілдіктер облыс халқының толықтай вакцина алуының және ревакцинация шараларының қарқынды жүргізілуінің арқасында мүмкін болды.
— Бүгінгі таңда 142 мың адам қайта егілді, 1-ші ақпанға қарай бұл көрсеткіш 238 мыңды құрайды. Жасөспірімдер мен халықтың басқа да санаттарын Pfizer препаратымен егу жалғасуда. Біз балаларымыздың денсаулығына қауіп төндіре алмаймыз, сондықтан, 9-11 сыныптарды қоспағанда, мектеп оқушылары қашықтықтан білім алуда, ал балалардың ойын-сауық орталықтары жабық. Мен кәсіпкерлерге еліміздегі қайғылы оқиғалар кезінде түсіністік танытып, қолдау көрсеткендері үшін алғыс білдіремін. Барлық мәселелерді ортақ келісім арқылы шешетінімізге сенімдімін,- деді облыс әкімі Даниал Ахметов.
Айтолқын САМАТОВА,
«Семей таңы»
