Ағымдағы жылдың айтулы бір жаңалығы ретінде 4-20 ақпан аралығында Қытай елінің астанасы Бейжің қаласында өтетін XXIV Қысқы Олимпиада ойындарын айтуға болады. Төрткүл дүние көз тіккен осынау аламанға қатысатын ел спортшыларының қатарында шығысқазақстандықтар да аз емес. Ол заңды да, облысымызда қысқы спорт түрлері өзге аймақтарға қарағанда анағұрлым жақсы дамыған.
Ұлттық құрама сапындағы облысымыздың барлық спортшылары енді бірер күнде
4-22 ақпан аралығында Бейжіңде өтетін Қысқы Олимпиадаға аттанады. Бұл әлемдік додаға биылғы жылы барлығы 95 ел қатысады екен. Ал жарыс бағдарламасында спорттың 7 түрінен 15 спорттық пән бойынша 109 медаль ойнатылады.
Біздің спортшылар фристайл, трамплиннен шаңғымен секіру, биатлон және тау шаңғысы сияқты спорт түрлерінен өнер көрсететін болады. Тоғыз шығысқазақстандық спортшы
13 лицензия жеңіп алған болатын. Бәрінің есімдері бізге жақсы таныс: Юлия Галышева, Аяулым Әміренова, Анастасия Городко, Дмитрий Рейхерд, Павел Колмаков, Олеся Граур, Сергей Ткаченко, Галина Вишневская-Шепоренко және Захар Кучин сынды ірі халықаралық жарыстарда жеңімпаз атанып жүрген саңлақтар. Алайда олимпиада кез келген спортшының өміріндегі басты сайыс екендігі анық.
Олимпиада барысында біз жанкүйер болатын жерлес спортшылардың арасында фристайл-могулдан ел намысын қорғайтын 6 спортышының ішінде ең таңдаулы саналатын фристайлшы Аяулым Әміренованы ерекше атап өткен жөн.
Аяулым Әміренова Өскемендегі спорттағы дарынды балаларға арналған мектеп-интернаттың түлегі. Фристайлдан Халықаралық дәрежедегі спорт шебері, Еуропа кубогының 2017 жылғы кезеңінің алтын, қола, күміс жүлдегері, 2018 жылы Пхенчханда өткен Олимпиада ойындарының қатысушысы.
Аяулымға неге ерекше тоқталып отырмыз? Себебі фристайл – қазақтың ұл-қыздары үшін игерілмеген аса күрделі спорт түрі. Соған қарамастан Аяулым өзінің табандылығы мен кәсіби шеберлігінің арқасында биік белестерді бағындыруда.
Бейжің Олимпиадасына қатысатын барлық спортшыларымызға жанкүйер болайық!
Барлық олимпиадашыларға сәттілік, жеңіс тілейміз!
Әлібек КЕМЕЛХАН,
«Семей таңы»
