«Nur Otan» партиясының саяси кеңесінің жаңа құрамы жарияланды.
«Nur Otan» партиясының кезектен тыс ХХІ съезінде саяси кеңестің 92 адамнан құралған жаңа құрамы бекітілді. Бұған дейін «Nur Otan» партиясы саяси кеңесіндегі өзгерістер туралы жариялаған еді.
Жалпы, партияның жоғары өкілді органы 55 пайызға жаңарған. Осыған дейін айтып өткеніміздей, Мемлекет басшысы Қасым-Жомарт Тоқаев «Nur Otan» партиясының Төрағасы болып бірауыздан сайланды.
Саяси кеңестің алдыңғы тізімінде 100 адам болған, жаңа тізімге енбегендер қатарында Мәдениет және спорт министрі Дәурен Абаев, ҚР Мемлекеттік хатшысы Ерлан Қарин, Мәжіліс депутаты Дариға Назарбаева, «Nur Otan» партиясы Төрағасының бірінші орынбасары Бауыржан Байбек, бұрынғы Премьер-Министр Асқар Мамин, Алматы қаласының әкімі Бақытжан Сағынтаев, Есеп комитетінің төрағасы Наталья Годунова бар.
Ал жаңа мүшелер қатарында – Президент Қасым-Жомарт Тоқаев, Парламент Сенатының төрағасы Мәулен Әшімбаев, Мәжіліс төрағасы Нұрлан Нығматулин, Президент әкімшілігінің жетекшісі Ерлан Қошановтар бар.
Бұл ретте «Nur Otan» партиясы өз саяси кеңесіндегі өзгерістер туралы айтып берді.
Атап айтар болсақ, «389 делегаттың 389-ы Саяси кеңес құрамының өзгерістеріне дауыс берді. Оған партия мүшелерінің санына пропорционалды түрде барлық өңірдің өкілдері енді. Жалпы, партияның жоғары өкілді органы 55%-ке жаңарды», — деп жазылған партия хабарламасында.
Партияның баспасөз қызметінің хабарлауынша, әйелдердің үлесі 33,7 пайызға дейін өсті. 35 жасқа дейінгі жастардың үлесі 6 есеге, яғни 13 пайызға дейін артты. Орташа жас мөлшері 4 жылға төмендеп, 47 жасты құрады.
Мемлекеттік қызметшілер саны үштен бірге қысқарды. Саяси кеңестің құрамында азаматтық сектордың өкілдері айтарлықтай артты. Білім беру саласының өкілдері 2 есеге (10%) артса, ҮЕҰ мен БАҚ үлесі 2 еседен астамға, 15,2%-ке ұлғайды.
Айта кетейік, «Nur Otan» партиясы саяси кеңесінің жаңа құрамында Өскемен қаласы мәдениет және тілдерді дамыту бөлімінің басшысы Қалқаман Сарин мен төрт дүркін әлем чемпионы, «Әлем Барысы», «Қазақстан Барысы» турнирлерінің екі дүркін жеңімпазы, Семей қаласындағы Көлік колледжінің директоры Айбек Нұғымаров та бар.
«Nur Otan» партиясы саяси кеңесінің жаңа құрамымен «Nur Otan» партиясының сайтынан танысуға болады.
Әлібек КЕМЕЛХАН,
«Семей таңы»
