Семей қаласы әкімдігінде кезекті отырыс өтіп, өткен жылдың әлеуметтік-экономикалық даму қорытындылары мен ағымдағы жылдың бірінші жарты жылдығына арналған міндеттер қаралды.
Қала әкімі Бақытжан Кәкенқажыұлының айтуынша, өткен жылы қаланың әлеуметтік-экономикалық дамуының барлық негізгі көрсеткіштері бойынша оң динамика сақталған. Әсіресе, өнеркәсіп өнімінің көлемі артып, алдыңғы жылғы деңгейден әлдеқайда жоғарылаған.
Соның ішінде өңдеу өнеркәсібінде даму бар. Өткен жылы кәсіпкерлікті қолдау картасы аясында, инвестиция көлемі 9,1 млрд теңге болатын мультикультураларды қайта өңдейтін автоматтандырылған кешен енгізілді. Соның нәтижесінде жаңадан 240 жұмыс орны ашылды.
Ауыл шаруашылығы жалпы өнімінің көлемі де артып, айтарлықтай табыстарға жетіп отыр. Өсімдік өсіру шаруашылығындағы өндіріс едәуір көлемде өскен. Мұндай жоғары көрсеткіш мал шаруашылығындағы өндіріске де тән.
Жалпы 2021 жылы қала экономикасына 110,7 млрд теңге немесе алдыңғы жылғы деңгеймен салыстырғанда 107,6 пайыз инвестиция салыныпты. Қаржыландыру көздері бойынша инвестициялар құрылымында кәсіпорындардың өз қаражатының үлесі мол.
Құрылыс жұмыстарының көлемі де артқан. Жүз пайыз өсу қарқынымен 202,2 мың шаршы метр тұрғын үй пайдалануға берілген.
Жұмыс істеп тұрған шағын және орта кәсіпкерлік субъектілерінің саны да артуда, оның ішінде заңды тұлғалар мен жеке кәсіпкерлер және шаруа қожалықтарының үлесі айтарлықтай жоғары.
Өткен жылы «Бизнестің жол картасы – 2025» бағдарламасы шеңберінде 13,7 млрд теңге сомасына 606 жоба субсидияланған. Нәтижелі жұмыспен қамтуды және жаппай кәсіпкерлікті дамытудың «Еңбек» бағдарламасы аясында жүзден аса жобаға қолдау көрсетіліпті.
Өңірлік деңгейде «Даму» кәсіпкерлікті дамыту қоры» АҚ-мен бірлесіп кәсіпкерлік субъектілерінің жобаларын жеңілдікпен қаржыландыру бағдарламасы іске асырылуда. Оның шеңберінде қырықтан аса жоба қаржыландырылған.
Дағдарысқа қарсы қабылданған шаралар шеңберінде «Жұмыспен қамтудың жол картасы» бағдарламасы бойынша Суық бұлақ кентіндегі су құбыры желілерін қайта құру және кеңейту жобасы енгізілді. Қалған үш жобаны іске қосу мерзімі биылғы жылға ауыстырылған. Жобаны жүзеге асыру барысында 336 жұмыс орыны құрылды.
«N Canon» жобалау компаниясы Восход кентінде 140 орындық балабақша құрылысын жүргізуге жобалық-сметалық құжаттама әзірлеуде. Сараптама қорытындысы ағымдағы жылдың наурыз айының соңында беріледі деп жоспарлануда. Сол тәрізді Бобровка кентіндегі 320 орындық балабақша бойынша жобаны ағымдағы жылдың ақпан айында алу жоспарлануда. Сараптама қорытындысы биылғы жылдың сәуір айында беріледі деп болжанып отыр.
Биылғы жылы көлік инфрақұрылымы саласында 37,4 шақырым автомобиль жолдары орташа жөндеуден өткізілді. Ұзындығы 56 шақырымға жететін тоқсанға жуық көшеге қиыршық құм – тас қоспасы төселіп, тегістелді, 106 көшеге ағымдағы жөндеу жұмыстары жүргізілді. Он екі оң жақ бұрылыс абаттандырылды. Қарағайлы тұрғын ауданындағы кварталішілік өтпе жолдардың құрылысы аяқталды.
Бұл бағыттағы жұмыстар биылғы жылы да осы қарқынмен жалғаспақ. Атап айтсақ, «Ауыл – ел бесігі» бағдарламасы аясында екі ауылға, оның ішінде: Мұқыр және Мұрат ауылдарындағы кіре беріс жолдарды орташа жөндеу жоспарлануда.
Жиын барысында қала әкімі Бақытжан Байахметов Семей қаласының 2022-2026 жылдарға арналған әлеуметтік-экономикалық даму болжамының көрсеткіштеріне қол жеткізу бойынша алдын алу шаралары қабылданатынын айтты. Соның аясында кешенді жоспардың уақтылы іске асырылуы бақыланады.
Әлібек КЕМЕЛХАН,
«Семей таңы»
