Семей қаласының әкімі Бақытжан Байахметов өткен апта соңында Семей қаласындағы Шығыс Қазақстан облыстық дарынды балаларға арналған мамандандырылған «Білім-Инновация» лицейінде болды.
Қазіргі күні мұнда 5-11-ші сыныптарда 200-ден астам оқушы білім алады. Олардың үштен бірі — көпбалалы, аз қамтылған отбасылардың балалары.
Лицей түлектерінің басым көпшілігі Қазақстанның ғана емес, шет елдердің де жоғары оқу орындарына түседі.
Қала әкімі лицейдің материалдық-техникалық базасымен танысып, оқу кабинеттерін аралап көрді. Мұндағы оқу аудиториялары тоза бастаған және жаңа технологиялармен айтарлықтай жабдықталмапты.
-Үздік оқу орынының бұрынғы даңқын жоғалтпауы үшін басымдықтарды сауатты белгілеу өте маңызды. Қаржыландыруды дұрыс жоспарлау керек. Жаратылыстану ғылымдары мен зертханалық сыныптарды заманауи оқу техникасымен жабдықтау қажет, — деді Бақытжан Байахметов.
Шаһар басшысының айтуынша, осыдан бірнеше күн бұрын әкімдікте қала мектептерінің қажеттіліктері қаралған. Білім бөлімінің жоспары сауатты дайындалған. Басымдықтардың көбі оқу жабдықтарын, озық оқыту техникаларын, мамандандырылған мектеп жиһазын және т.б. сатып алуға бағытталған.
— Өкінішке орай, «Білім-Инновация» лицейінен қажеттіліктер бойынша мұндай егжей-тегжейлі және негізделген жоспарды көрген жоқпын. Сондықтан да, лицейдің 25 миллион тенгені құрайтын сұранысын біраз қысқартуға тура келді, — деді Бақытжан Байахметов.
Сонымен қатар, қала әкімі балалар үшін қолайлы жағдай жасауға барынша көмек көрсетуге дайын екендігін айтты. Бірақ, бұл үшін лицей басшылығы өз жұмысының бағытын нақты белгілеуі керек.
— Оқу базасы үнемі жаңартылып отырмаса, оқу процесінде заманауи білім беру технологиялары қолданылмаса, балаларды оқу орнының қабырғасында ұстау оңай болмайды, — деп түйіндеді сөзін қала әкімі Бақытжан Байахметов.
Семей қалалық ішкі саясат бөлімі
