Қаламызда қоныс тойын тойлайтындар саны жылдан-жылға еселеп артып келеді. Өткен аптаның соңында ғана Семейдегі бірнеше отбасы жаңа баспананың кілттерін алды. Қаланың іргесіндегі Комсомол кентінде салынған үйлерге 20 отбасы қоныстанды.
Айта кетейік аталған кенттегі жеке сектордағы жаңа үйлер «Бір қабатты Шығыс» бағдарламасы аясында салынған. Баспанаға қол жеткізген отбасылардың 15-і — көп балалы, қалғандары — толық емес отбасылар, ардагерлер мен зейнеткерлер, сондай-ақ мүмкіндігі шектеулі балаларды тәрбиелеп отырған халықтың әлеуметтік осал топтарынан.
Қазіргі таңда, Семейде мемлекеттік тұрғын үй қорынан тұрғын үй алу кезегінде 12 535 отбасы тұр екен. Оның ішінде 1039-ы — көп балалы отбасылар, 4399-ы — әлеуметтік осал топтарға жататын азаматтар, 1682-сі — жетім балалар.
Бұл жолы жаңа пәтерге қол жеткізгендер сатып алу құқығынсыз жалға берілетін тұрғын үйлерге қоныстанды. Ең бастысы, баспаналар мейлінше жайлы, барлық жағдай жасалған.
Соңғы уақытта әлеуметтік жағынан тартымды банктік бағдарламалар бойынша тұрғын үй сатып алып жатқан отбасылар да аз емес. Мәселен, өткен жылы «Бақытты отбасы» бағдарламасы бойынша Қарағайлы шағын ауданында 65 отбасы баспанамен қамтылды. Осы бағдарлама аясында, тағы 100 отбасы екінші нарықтағы тұрғын үйлерді алды. «Шаңырақ» және «Әскери баспана» бағдарламалары бойынша 25 пәтер кілті берілген. Сонымен қатар, тағы да 75 отбасы мемлекет есебінен бір миллион теңге көлеміндегі арнайы тұрғын үй сертификаттарына ие болды.
Айта кетерлігі, қазіргі таңда Семейде тұрғын үй құрылысы жақсы қарқынмен дамуда. Ағымдағы жылы мемлекеттік тұрғын үй қорынан баспана алуға кезекте тұрған азаматтарға Қарағайлы тұрғын ауданында 128 жалдамалы пәтер бөлінеді. Оның 32-сі көп балалы отбасыларға, 71-і халықтың әлеуметтік осал топтарына, 25 -і жетім балаларға берілетін болады.
Биыл сонымен қатар «Бір қабатты Шығыс» бағдарламасы аясында 28 екі пәтерлі тұрғын үй салынады. Оларды «Бақытты отбасы» банк бағдарламасы бойынша жүзеге асыру жоспарланған. Көп балалы және толық емес отбасылардан 56 отбасы тұрғын үй сатып алуға ниет білдірген.
Сонымен қатар, «Шаңырақ» және «Әскери баспана» бағдарламалары бойынша тағы 30 пәтер беру жоспарланып отыр.
«СТ» — ақпарат
