«Семей — Адалдық алаңы» жобалық кеңсесінің басшысы кәсіпкерлік бөлімінің қызметкерімен бірлесе отырып әлеуметтік маңызы бар азық-түлік бағасының қымбаттауына жол бермеу мақсатында қаладағы дүкендерде мониторинг жүргізді.
Айта кетейік, баға тұрақтылығын қамтамасыз ету мақсатында шаһардағы азық-түлік дүкендері мен кәсіпкерлік бөлімі арасында меморандумға қол қойылған. Аталған құжатқа сәйкес әлеуметтік маңызы бар өнімдер тізбесіне кіретін 19 тауарға қосылатын үстеме ақы белгіленген шектен аспауы тиіс. «Сауда қызметін реттеу туралы» Заңның 9 — бабына сәйкес дүкендер тауарлардың бағаларын өз бетінше белгілейді, ал әлеуметтік маңызы бар азық-түлік тауарларын өткізу бағасы өндірушінің немесе көтерме өнім берушінің сатып алу бағасының 15 пайызынан аспауға тиіс.
Қазіргі күні қаламыздағы әлеуметтік сауда нүктелеріне тұрақтандыру қорынан арзан бағадағы азық-түлік күн сайын жеткізіліп тұрады.
Ішкі сауда қағидаларының 15 — тармағына сәйкес, сатып алушы өткізушіден (сатушыдан) өндірушінің немесе көтерме сауда берушінің бағасы көрсетілген әлеуметтік маңызы бар өнімдерге тауар — ілеспе құжаттарды сұратуға және 15 пайызды өз бетінше есептеуге құқылы. Баға 15 пайыздан асқан жағдайда, тауар — ілеспе құжаттарды, сөредегі тауар бағасын, дүкен атауын (ЖК/ЖШС) суретке түсіріп, осы ақпаратпен қала әкімдігіне хабарласу қажет.
«СТ» — ақпарат