Күн тақырыбына
Шығыс Қазақстан облысында 400 мыңға жуық адам коронавирусқа қарсы ревакцинациядан өтті.
ШҚО Денсаулық сақтау басқармасы баспасөз қызметінің мәліметіне сүйенсек, бүгінгі таңда өңірде COVID-19 инфекциясына қарсы америкалық Pfizer вакцинасын салдыру науқаны қарқынды жалғасуда.
«Аймақ бойынша аталған екпенің бірінші компонентін 106 мыңға жуық адам салдырды. Оның ішінде 12 — 18 жас аралығындағы 93 547 бала бар. Оларды вакциналау тек ата-анасының рұқсатымен жүргізілуде. Сондай-ақ 3600 жүкті және 8806 бала емізетін әйел екпе алды», — делінген ақпаратта.
Бұдан бөлек облыста 50 жастан асқан ересектер мен медицина қызметкерлері де Pfizer екпесімен ревакцинациядан өтуде. Қазір осы санаттағы 15 348 адам үшінші рет вакцина алып отыр. Соңғы мәліметтерге сәйкес, Шығыс Қазақстанда 398 863 адам коронавирусқа қарсы ревакцинациядан өткен.
Сонымен қатар облыста 84 мыңнан астам бала коронавирусқа қарсы Pfizer вакцинасының екі компонентін салдырған.
Айта кетсек, COVID-19 пандемиясы басталғалы бері Шығыс Қазақстан облысында 60 мыңға жуық адам вирус жұқтырған екен. ШҚО Денсаулық сақтау басқармасы баспасөз қызметінің мәліметіне сүйенсек, соңғы тәулікте аймақ бойынша 36 адамнан коронавирус анықталған. Жалпы облыс стационарларында төсек-орын қорының жүктемесі 10,6 пайызды құрап отыр.
«COVID-19 пандемиясы басталғалы бері Шығыс Қазақстанда 59338 адам вирус жұқтырды. Оның ішінде Өскемен қаласында – 22032 (жалпы санның 37 пайызы), Семейде – 19663 (33 пайызы), Глубокое ауданында – 2884 (4,9 пайызы), Риддерде – 2257 (3,8 пайызы), Алтай ауданында – 2042 (3,4 пайызы) пациент тіркелді. Ал коронавирусқа шалдыққандар саны бойынша ең төменгі орында – Күршім (323 науқас), Үржар (205 науқас), Абай (191 науқас) аудандары тұр», — делінген ақпаратта.
Бүгінде облыс бойынша ПТР-тестілерін 19 зертхана жүргізеді. Осы уақытқа дейін облыс жұртшылығы сол зертханаларда 1393763 рет сынама тапсырған. Оның 4,3 пайызында коронавирус табылды.
Азамат ЕРСАЙЫН,
«Семей таңы»
