Облыс әкімі Даниал Ахметов апта ішінде өңірдің әлеуметтік-экономикалық даму мәселелері жөнінде кеңес өткізді. Жиын барысында тұрғын үй, әлеуметтік нысандар құрылысы саласына баса назар аударылды.
Аймақ басшысы атап өткендей, қазіргі таңда бұл нысандарды салумен айналысатын мердігерлер барлық жұмыстардың нақты кестесі ұсынылған үш жақты құжатқа қол қоюы қажет.
— Шарттың тараптары — елді мекендердің әкімдері, құрылыс басқармасының басшылығы және мердігерлер. Биыл біз бірқатар жобаларды аяқтаймыз, олар Степнойдағы және Риддердегі мектептер, Өскемендегі 244 орындық жатақхана, Семейдегі оңалту орталығы. Наурыз айында облыс орталығында әлемдік стандартқа сай салынған үстел теннисі орталығы пайдалануға беріледі, — деді Даниал Кенжетайұлы.
Сонымен қатар, ТҮКШ саласында облыста 60-тан астам жобаны іске асыру қажет, бұл сумен жабдықтау жүйелерін қайта жаңарту, аудандарда блокты-модульді станциялар салу және басқа да инженерлік-коммуналдық инфрақұрылымға қатысты жобалар. Бұл бағытта орасан жұмыс күтіп тұр.
— Балабақшалардағы орын тапшылығын жою қажет екенін атап өткім келеді. Ол үшін әрбір ауданда мемлекеттік-жеке меншік әріптестік шеңберінде мектепке дейінгі мекеме ғимаратын салу немесе қайтару қажет, — деді облыс әкімі.
Сондай-ақ, аймақ басшысы облыстық мәслихат депутаттары мен жергілікті басқарма басшыларына өңірдің барлық 720 елді мекеніне жеке барып, адамдардың тілектерін тыңдауды, ауылдың даму барысы немесе ауылдың қалай өмір сүретіні туралы нақты ақпарат алып, әрбір елді мекеннің даму жоспарын құруды тапсырды. Және бұл тапсырмалар ұзаққа созылмай орындалуы тиіс.
Әлібек КЕМЕЛХАН,
«Семей таңы»
