Семей қаласындағы физика-математика бағытындағы Назарбаев Зияткерлік мектебіне көшпелі көрме келді. Қаламыздағы облыстық тарихи-өлкетану мұражайы ұйымдастырған көшпелі көрмеде 3 күн бойы шәкірттеріміз түрлі тақырыптарда дәрістер тыңдап, құнды жәдігерлермен танысты.
Мұражай ұсынысына қолдау білдірген мектеп әкімшілігі санитарлық талапты сақтай отырып, көрмені тамашалау үшін арнайы кесте құрды. Осы кестеге сәйкес әр сынып өздеріне тиесілі уақытта қала тарихы, өлкенің табиғаты, Алаш қозғалысының тарихы туралы құнды мағлұматтармен қанықты.
— Біз әр білім ошағына жасаған сапарымызда оқушылардың қызығушылықпен назар аударып, өткен тарихи оқиғалар желісіне ерекше мән беретіндіктерін байқаймыз. Түрлі сауалдар қояды. Соның ішінде ұлдар ат әбзелдері, қыздарымыз ерте замандардағы зергерлік бұйымдарға тамсана қарайды. Оларды қолымен ұстап көреді. Біздің осы шарамыздың өзі жас ұрпақ үшін тәрбиелік мәні зор, білім беру ісінде де маңызды деп есептейміз, — дейді мұражайдың экскурсиялық — бұқаралық бөлімінің меңгерушісі Алтынай Абылқасымова.
Шәкірттеріміз көрмеден қаламыздағы ежелгі ғимараттардың тарихы, тарихи нысандар, аймақтың флорасы мен фаунасының әр түрлілігі, жойылып бара жатқан жануарлардың түрлері және өзге де мағлұматтар жайлы білімдерін толықтыруға мүмкіндік алды.
Семей қаласындағы физика-математика бағытындағы
Назарбаев Зияткерлік мектебі баспасөз қызметі
