Tengrinews.kz негізін қалаушы және Alash Media Group холдингінің басшысы Батыр Қазыбаев ұзақ аурудан кейін қайтыс болды. Ол 53 жаста еді.
Батыр Қазыбаев белгілі қазақстандық журналист әрі жазушы, көп жыл бойы облыстық және республикалық газеттердің редакцияларында басшылық лауазымдарда қызмет атқарған, Қазақстан Компартиясы ОК хатшысы болған Кәкімжан Қазыбаевтың ұлы.
Батыр Қазыбаев 10 жылдан астам уақыт құрамына Tengrinews.kz, Vesti.kz, Massaget.kz ақпараттық порталдары кіретін медиахолдингті, Ретро FM Қазақстан, Жұлдыз FM радиостанциясы, СТВ телеарнасын басқарды және «Жетінші арнаның» негізін қалады. Осылайша, 2010 жылы Tengrinews жаңалықтар порталы пайда болды.
Сондай-ақ, Батыр Қазыбаев Қазақстандағы алғашқы Tengri FM рок-радиостанциясын, ал кейінірек елдегі алғашқы қазақ тіліндегі Жұлдыз FM толқынын құрды. Ол негізін қалаған The Spirit of Tengri этникалық музыка фестивалі Алматының визит картасына айналып қана қоймай, үлкен мәдени жобаға айналды.
Ол қазақ тілді аудиторияға бағытталған жобаларға да ерекше назар аударды. Massaget.kz жастар сайты іске қосылды. Tengrinews.kz сайтының қазақ тіліндегі нұсқасы, «Жұлдыз ФМ» радиостанциясы, бүгінде қоғамдық-саяси сайтқа айналған «Алаш айнасы» газеті ашылды.
«Қазір қазақ тілінде жаңа контент пайда болып жатқан қызық уақыт, оған қатысу – мен үшін мақтаныш», – деген Батыр Қазыбаев.
Tengrinews ұжымы, сондай-ақ «Алаш Медиа групп» Батыр Қазыбаевтың туған-туыстары мен жақындарына қайғырып көңіл айтады.
