ТАСҚЫННЫҢ АЛДЫН АЛУ ШАРАЛАРЫ ЖҮРГІЗІЛУДЕ
Семейде қала жолдары жиегіндегі еріген суларды және жаңбыр суларын соруға 16 млн теңге бөлінді. Жоспарда 25 мың текше метр еріген суды сорып шығару және 5000 текше метр инертті материалды жеткізу жоспарланған. Жеткізуші — «Семей Тазалық» ЖШС. Бұл туралы Семей қаласының аймақтық коммуникациялар қызметінде өткен брифингте жауапты органдардың өкілдері айтып берді.
– 5 – 11 наурыз аралығында қала тұрғындарынан 939 тапсырыс түсті. Бүгіндері 4 800 текше метр су сорып шығарылды. Су басқан жерлерге 576 текше метр инертті материалдар жеткізілді. Биылғы жылы дренажды және нөсерлі кәріз желісін ұстауға 114 млн теңге бағытталды. Қазіргі уақытта резервуарларда сорып шығару және еріген сулардың ағуы үшін кәріз құдықтарының қақпақтарын ашу жұмыстары жүргізілуде, – деді Семей қаласының жолаушылар тасымалы және автомобиль жолдары бөлімінің бас маманы Жасар Түсіпов.
Жалпы, Семей өңірі бойынша жағдай тұрақты. Ертіс өзенінің деңгейі 450 см, шекті деңгейде 149 см-ді құрайды. «Бүгінгі күні Ертіс өзеніндегі мұз Мирный кентіне дейін ашылды, ағыстың төмен жағында жыралар бар. 5 наурызда Мирный кентінде, Ипподром ауданында Ертіс өзеніндегі мұздарды жару жұмыстары жүргізілді. Жару жұмыстарын «KAZ EXPLO SERVICE» ЖШС жүргізді. Жергілікті атқарушы органдардың күшімен жеке сектордан 15 000 текше метрі, қала көшелерінен 7214 текше метр еріген су сорып шығарылды», – деп түйіндеді сөзін Семей қаласының Төтенше жағдайлар басқармасы бастығының орынбасары азаматтық қорғаныс подполковнигі Ернар Жәлелов.
Семей қаласының ақпараттық орталығы