АҚЖАРЛЫҚТАРДЫҢ АРМАНЫ ОРЫНДАЛАТЫН БОЛДЫ
Президент Қасым-Жомарт Тоқаевтың Абай облысын құру туралы шешімі ел шығысына елеулі жаңалықтар әкелуде. Мәселен, 1997 жылы бұрынғы Семей облысы мен Шығыс Қазақстан облысы біріктірілген сәтте Ақсуат ауданына қосылған бұрынғы Тарбағатай ауданы енді қайтадан бөлініп шығып, Шығыс Қазақстан облысының құрамында қалдырылмақ.
Осы аптаның ішінде VII шақырылған Тарбағатай аудандық мәслихатының кезекті сессиясы өңір тарихында қалатын болды десек қателеспейміз. Мәслихат сессиясында Тарбағатай ауданының әкімшілік-аумақтық территориясын бұрынғы Ақсуат ауданының шекаралық территориясын сақтай отырып және бұрынғы Тарбағатай ауданының шекаралық территориясын сақтай отырып, екіге бөлу туралы ұсыныс қаралды. Сессияға қатысқан депутаттар бұл ұсынысты бір ауыздан қолдады.
Жалпы бұл бастамаға жергілікті тұрғындардың ұсыныстары мен талап-тілектері де ықпал еткені анық. Жиын барысында ҚР «Әкімшілік-аумақтық құрылысы туралы» Заңының 12 бабына сәйкес, жергілікті халықтың пікірі ескеріле отырып Тарбағатай аудандық мәслихаты шешім қабылдап, аудан әкімдігі қаулы етті.
Оған сәйкес, бұрынғы Ақсуат ауданының шекаралық территориясын сақтай отырып, Ақсуат ауданы құрылып, әкімшілік орталығы Ақсуат ауылы болып белгіленіп, Абай облысының құрамына енгізіледі. 1997 жылға дейінгі Тарбағатай ауданының территориялық шекарасын сақтай отырып, әкімшілік орталығы Ақжар ауылы болып белгіленіп, Тарбағатай ауданы құрылып, Шығыс Қазақстан облысының құрамында қалдырылады.
Бұл шешімді сессия жұмысы барысында мәслихат төрағасы Асқар Жұмашұлы жария етті.
– Осы орайда аудан басшылығы аудандық мәслихат депуттатарымен бірігіп барлық ауылдық округтердегі әкімдіктердің аппаратымен, жергілікті қоғамдастық мүшелерімен 62 елді мекенде арнайы жиындар өткізіп, түсіндіру жұмыстарын жүргізді. Осы ұсыныс кеңінен талқыланды, – деп атап өтті Асқар Боғырбаев.
Ендігі аралықта әкімшілік-аумақтық құрылымды қайта жасақтау үшін екіге бөлінетін өңірде үлкен жұмыстар күтіп тұр.
Өз тілшіміз
