ҚАРАҒАЙЛЫ ҚАНАТЫН ЖАЯ ТҮСПЕК

ҚАРАҒАЙЛЫ ҚАНАТЫН ЖАЯ ТҮСПЕК

Семей қаласы әкімдігінің отырысында тұрғын үй құрылысы және әлеуметтік маңызы бар автобус маршруттарын субсидиялау мәселелері қаралды.

«Нұрлы жер» мемлекеттік тұрғын үй құрылысы бағдарламасы аясында тұрғын үйге мұқтаж азаматтарды баспанамен қамтамасыз ету үшін Қарағайлы шағын ауданында көп пәтерлі тұрғын үйлер салуға арналған негізгі алаңдар анықталды. Болашақта 293 гектар аумақта 36 мыңға жуық адам тұрады деп жоспарлануда.

Бүгінде мұнда жалпы ауданы 215,344 мың шаршы метр (2738 пәтер) болатын 39 үй пайдалануға берілді.

2022 жылы қалада жалпы ауданы 367,4 мың шаршы метр болатын 75 үйдің (4396 пәтер) құрылысы жүргізілуде. Оның ішінде 38 несиелік үй, 2 сатып алу құқығынсыз жалға берілетін үйдің және «Ертіс» әлеуметтік-кәсіпкерлік корпорация» АҚ-мен бірлесіп 4 коммерциялық үйдің құрылысы жүргізілуде. Сондай-ақ жеке инвесторлар 31 көп қабатты үйдің құрылысын жүргізуде.

Биыл жеке инвесторлар есебінен 7,490 мың шаршы метр, халық есебінен 74,5 мың шаршы метр жеке тұрғын үй пайдалануға берілетін болады.

2022 жылдың қорытындысы бойынша қаржыландырудың барлық көздері есебінен жалпы ауданы 263,800 мың шаршы метр тұрғын үйді пайдалануға беру жоспарлануда (өткен жылдың көлеміне қарағанда 130,5 пайыз өсіммен 2276 пәтер).

2023 жылға жалпы ауданы 185,9 мың шаршы метр (2120 пәтер) 38 үйдің құрылысы жоспарлануда.

51 құрылыс жобасы бойынша жобалық-сметалық құжаттама әзірленді. Оның 18-інде мемлекеттік сараптама қорытындысы бар.

Семей қаласының әкімі Бақытжан Байахметов жылу профициті бар аудандарда (сол жағалау) қайта жаңғырту жұмыстарын жалғастыру қажеттігіне назар аударды.

— Тұрғын үйді пайдалануға беру кесте бойынша жүргізілуі тиіс. Келесі аптада құрылыс учаскелері мен жобалардың ағымдағы жағдайын анықтау үшін құрылыс учаскелерін аралап, қажет болған жағдайда, бюджетті нақтылау кезінде оларды қаржыландыруға қосуды тапсырамын, — деді Бақытжан Байахметов.

Келесі кезекте әлеуметтік маңызы бар автобус бағыттарын субсидиялау мәселесі қаралды.

Әлеуметтік маңызы бар бағыттар бойынша жолаушылар тасымалын жүзеге асыруға байланысты тасымалдаушының шығындарын субсидиялау бюджет қаражаты есебінен субсидиялау қағидаларымен және «Мемлекеттік көрсетілетін қызметтер туралы» Қазақстан Республикасының Заңымен реттеледі.

Қала әкімінің 2019 жылғы 9 желтоқсандағы № 58 өкімімен әлеуметтік маңызы бар жолаушылар тасымалын жүзеге асырумен байланысты тасымалдаушылардың шығындарын субсидиялау мәселесін зерделеу үшін жұмыс тобы құрылды.

Қағидалардың 7-ші және 8-ші тармақтарына сәйкес, 40 маршруттың ішінен 38 маршрутқа есептеулер ұсынылды, № 52 және № 49 маршруттарды қоспағанда, олардың барлығы әлеуметтік маңызы бар тізбеге енгізілді.

Семей қаласының жолаушылар көлігі және автомобиль жолдары бөлімі, «Семей қ. КҚПБ» ЖШС және «Таксомотор паркі» ЖШС, «Семавтопарк» ЖШС, «Авто Транс Семей» ЖШС арасында үш жақты субсидиялау шарты жасалды.

2022 жылы 38 әлеуметтік маңызы бар маршрутты субсидиялау үшін 3 922 245,1 мың теңге қажет.

Шығыс Қазақстан облысы Семей қаласының жолаушылар көлігі және автомобиль жолдары бөлімі 2022 жылдың 21 ақпанында ШҚО жолаушылар көлігі және автомобиль жолдары басқармасына жоғарыда көрсетілген әлеуметтік маңызды бағыттарды субсидиялауға бюджеттік өтінім берді. Өтінім әлі қолдау тапқан жоқ. Семей қаласының әкімі Бақытжан Байахметов өз орынбасарларына осы мәселені шешу үшін облыс орталығына баруды тапсырды.

Жолаушылар көлігі және автомобиль жолдары бөліміне осы жылдың соңына дейін тасымалдаушылар қанша автобус сатып алуды жоспарлап отырғандығы туралы ақпарат дайындау тапсырылды.