ІЗДЕГЕНГЕ ЖҰМЫС БАР
Жуырда Семейдегі Мәдениет сарайында жұмыспен қамту орталығының ұйымдастыруымен бос жұмыс орындарының жәрмеңкесі болып өтті.
Әсіресе жастар көп жиналған осы жолғы жәрмеңкенің болатыны күні бұрын хабарланған-ды. Жәрмеңкеге 300-ден аса жұмыс іздеуші қатысты, олардың қатарында жұмыспен қамту орталығында есепте тұрған жұмыссыздар, жоғарғы оқу орындарының және колледждердің студенттері, NEET санатындағы жастар, пробация қызметінде есепте тұрған және бас бостандығынан айыру орындарынан босап шыққан, ҚР Тәуелсіздігінің 30 жылдығына байланысты рақымшылық жарияланған тұлғалар, алиментшілер, аз қамтылған және басқа да санаттағы азаматтар бар.
Жәрмеңкеге қаладағы 30 кәсіпорын мен мекеме бос орындарды ұсынды. Олардың қатарында «Біріккен энергосервис компаниясы» АҚ, «БАСТ» Бөрілі кеніші, «Шығыс Қазақстан ұн — құрама жем комбинаты» ЖШС, «Семей цемент зауыты» ӨК, «Семей құрылыс материалдары», «Daewoo Bus Kazakhstan», «СемАЗ», «Прииртыш бройлер құс фабрикасы», «Шығыс бройлер», «Семей сервис компаниясы», «Олжас», «Сәт транс», «Фирма Азия», «Роза ВВК», «Kondiz», «Семспецснаб», «Зеленстрой», «Семей тазалық» жауапкершілігі шектеулі серіктестіктері және басқа да кәсіпорындар мен колледждердің өкілдері болды.
— Бүгін біз бос орындар жәрмеңкесіне қызметкерлер іріктеп алу мақсатында қатысып отырмыз. Бізге, «Семей тазалық» ЖШС-ға, жұмыс тәжірибесі бар заңгер, жүк тиеушілер, қоқыс көлігінің жүргізушісі және оператор қажет. Бұл — қоқыс шығарудан клиентке қызмет көрсетуге дейінгі жұмыстар. Әлеуетті қызметкер бірінші кезекте сыпайы болуы керек. Біз кездесулер өткізудеміз. Жастарына байланысты шектеулер жоқ, – деді «Семей тазалық» ЖШС кадрлар бөлімінің өкілі Айзада Мұратова.
Жұмыс берушілер барлығы 400-ге жуық бос орындар ұсынды. Олардың 180-ге жуығы жұмысшы және 200-ге жуығы мамандық иелерінің вакансиялары.
— Жұмыс іздеп жүрген тұлғаларға әлеуметтік жұмыс орындарын, қоғамдық-төленетін жұмыстар, «Жастар тәжірибесі», «Алғашқы жұмыс орны», «Ұрпақтар келісімшарты», «Күміс дәуір», сондай-ақ Кәсіпкерлікті дамытудың 2021 — 2025 жылдарға арналған ұлттық жобасы шеңберінде одан кейін жұмыспен қамту мақсатында еңбек нарығында сұранысқа ие мамандықтар бойынша курстардан өту ұсынылады. Бүгін жәрмеңкеге қатысушыларға слайдтар мен буклеттер көрсетілді. Вакансиялар жәрмеңкесінің арқасында адамдар лайықты жалақысы бар жұмыс табады деп үміттенеміз, – дейді халықты жұмыспен қамту орталығының директоры Дариға Дайырова.
Сонымен қатар жұмыспен қамту орталығының мамандары жәрмеңкеге қатысушыларға әлеуметтік мекенжай көмегін, тұрғын үй көмегін және жеңілдетілген несиелер алу мәселелері бойынша кеңестер берді.
Өз тілшіміз
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
