ӘЛЕУМЕТТІК НАН ҚЫМБАТТАМАЙДЫ
Қазақстанда әлеуметтік нан бағасы көтерілмейді. Бұл туралы 11 сәуір күні ҚР Президенті жанындағы Орталық коммуникациялар қызметінде «Қазақстанның астық нарығындағы ахуал туралы» тақырыбында өткен брифингте айтылды. Ауыл шаруашылығы Бірінші вице-министрі Айдарбек Сапаров азаматтарды астық пен ұнның ішкі нарығындағы ағымдағы жағдайдан хабардар етті.
– Бүгінгі күні республикада ешқандай тапшылық жоқ, астық жеткілікті мөлшерде бар. Азаматтарды дүрлікпе тудырмауға, сондай – ақ жеке мүдделердің сұрақтарын халықтың қамы деп шатастырмауға шақырамыз», – деді Айдарбек Сапаров.
– Бізде екі түрлі нан бар. Біріншісі әлеуметтік нан. Оның бағасын мемлекет реттейді және бақылайды. Бүгінде әлеуметтік нанның бағасы өңірлерде тұрақты, өзгермейді. Егер жекелеген өңірлерде диірменшілер шикізат тапшылығына тап болса, немесе бидай бағасы күрт өссе, онда бидай құнын субсидиялау бағдарламасы іске қосылады. Яғни қазіргі таңда әлеуметтік нан бағасының көтерілуіне ешқандай алғышарт жоқ», – деп жауап берді АШМ Егіншілік департаментінің директоры Азат Сұлтанов журналистердің нан бағасына қатысты қойған сұрақтарына.
Айта кетелік, бұған дейін Қазақстанда диірменшілер астық тапшылығына байланысты жұмысын тоқтатуға мәжбүр екені туралы ақпарат тараған болатын.
Жалпы, азаматтар бағаның негізсіз өсуіне куә болған жағдайда кәсіпкерлік бөліміне хабарлауы қажет. Ол үшін тауарды сатып алғаныңыз туралы түбіртек немесе бағаның қымбаттағанын дәлелдейтін фотосурет болуы шарт. Сол кезде мамандар тиісті шара қолданатын болады.
Азамат ЕРСАЙЫН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
