АЗЫҚ-ТҮЛІК ҚҰНЫ АСПАНДАП БАРАДЫ
Ұлттық банк төрағасы Ғалымжан Пірматов Қазақстандағы азық-түлік бағасының өсуі соңғы уақыттарда орын алып отырған инфляцияға байланысты екенін түсіндірді.
— Қазақстандағы инфляция 2022 жылдың наурызында 2016 жылдың қыркүйегінен бастап шарықтау шегіне жетіп, бір айда 8,7 пайыздан 12 пайызға дейін өсті. Инфляцияға ең көп үлес қосқан азық-түлік тауарлары болды, олардың бағасының өсуі 10 пайыздан 15,4 пайызға дейін жеделдеді, бір айда инфляция 5,8 пайызға өсті, — деді Ұлттық банк басшысы Үкімет отырысында өткен жиын барысында.
Сонымен қатар, Ғалымжан Пірматовтың айтуынша, жылдық бағаның айтарлықтай өсуі байқалған таурлар: ақ қырыққабат, қант, картоп, қызанақ өнімдері екен.
— Ағымдағы жылғы наурыздың төртінші аптасында әлеуметтік маңызы бар азық-түлік тауарларының бағасы жылдық мәнде 18,6 пайызға дейін өсті. Бұл өсімге наурыздың екінші аптасында белгілі бір азық-түлік тауарларына сұраныстың күрт артуы ықпал етті. Әлеуметтік маңызы бар азық-түлік тауарлар бағасының апта сайынғы өсуі наурыздың соңғы аптасында 1,3 пайыз, сәуірдің бірінші аптасында 0,9 пайыз болып, тұрақталып келеді. Азық-түлікке жатпайтын тауарлар бағасы айырбас бағамының төмендеуіне байланысты қысымға ұшырады және азырақ байқалды. Ол наурызда 8,6 пайыздан 10,9 пайызға дейін өсті, — деді Ұлттық банк басшысы.
Оның айтуынша, ақылы қызмет көрсету бағасы 7,1 пайыздан 8,3 пайызға дейін өскен, бұл бірқатар нарықтық қызмет бағасының өсуіне байланысты.
— Үкімет пен жергілікті атқарушы органдардан алдын алу шараларын қабылдау және маусымдық бағаның өсуіне жол бермеу талап етіледі. Бағаның негізсіз өсуіне жол бермеу үшін бөлшек сауда үстемесінің сақталуын тиімді бақылау қажет, — деді Пірметов.
Еске сала кетейік, Үкімет отырысында ҚР Премьер-министрі Әлихан Смайылов деңгейлік әкімдерге азық-түлік бағасын қатаң бақылауда ұстауды тапсырған болатын.
Әзірлеген Қ.ӘЛІМБЕК,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
