ГЕМАТОЛОГИЯЛЫҚ ОРТАЛЫҚТЫҢ ҚҰРЫЛЫСЫ АЯҚТАЛУҒА ЖАҚЫН
Бүгінгі таңда Өскемен қаласында еліміздегі тұңғыш гематологиялық орталықтың құрылысы қарқынды жүргізілуде.
ШҚО әкімдігінің мәліметіне сүйенсек, Өскеменде түрлі күрделі оталарды жасайтын еліміздегі жалғыз гематологиялық орталықтың құрылысы аяқталуға жақын.
Даниал Ахметовтің айтуынша, бұл орталық халықаралық стандарттарға сай болады. Мұнда жоғары дәлдіктегі диагностика мен зертханалық зерттеулер жүргізіледі, сонымен қатар ғылыми іс-шараларды өткізуге, пациенттерді ең заманауи жабдықты пайдалана отырып емдеуге мүмкіндік бар. Онда балалар мен ересектерге арналған гематологиялық бөлімшелер, жілік майын трансплантациялау, радиациялық диагностика, реанимация, генетикалық зертхана және трансфузиология орталығы орналасады.
Бас корпуста күндізгі стационар мен емхана ашылады.
Қазіргі уақытта медициналық кадрларды даярлау, дәрігерлердің біліктілігін арттыру мәселесі пысықталып жатыр.
«Бүгінде 29 дәрігер Израильге барып, білім алып жатыр. Олардың кейбірі балалар онкогематологиясы бойынша жұмыс істейді. Алдағы уақытта басқа мамандар Санкт-Петербург пен Минск клиникаларына оқуға барады», — дейді ШҚО әкімі.
Тоқтала кетсек, соңғы жылдары облыс әкімі Даниал Ахметовтің қолдауымен аймақтағы медицина саласы қарқынды дамып келеді. Соның ішінде емдеу орталықтарын заманауи жабдықтармен қамтамасыз ету және шетелдерде дәрігерлер біліктіліктерін көтері ісіне айрықша басымдық беріліп келеді.
Динара НҰРЛЫБЕКҚЫЗЫ,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
