60,2 ШАҚЫРЫМ ҚАЛАІШІЛІК ЖОЛДАР ЖӨНДЕЛЕДІ
Семей қаласы әкімдігінде өткен жиында биылғы жылға жоспарланған жол-құрылыс жұмыстарын ұйымдастыру мәселесі қаралды. Бұл туралы жолаушылар көлігі және автомобиль жолдары бөлімінің басшысы Ерлан Уәлиев айтып берді. Баяндамашы атап өткендей, қаладағы жолдардың жалпы ұзындығы 756 шақырымды құрайды (қанағаттанарлық жағдайда – 25,4 %), оның ішінде асфальтбетон жабыны бар жолдар – 291,2 км (қанағаттанарлық жағдайда – 58,4 %), қиыршық тасты – топырақты жабыны бар жолдар – 464,8 км (қанағаттанарлық жағдайда – 5 %).
Жолаушылар көлігі және автомобиль жолдары бөлімі басшысының айтуынша, 2022 жылға арналған жұмыс жоспарында қала жолдарын орташа жөндеу жұмыстарын жүргізуге 3405,7 млн теңге сомасында ақшалай қаражат көзделген. Ағымдағы жылы жөндеудің барлық түрлері (күрделі, орташа және ағымдағы) жүргізіледі. Аталған қаражатқа жалпы ұзындығы 60,2 шақырым болатын 62 көшені – оң жағалауда – 16 көше, сол жағалауда – 18 көше, қаланың орталық бөлігінде 28 көшені орташа жөндеу жоспарланған.
– Автокөлік көпірінің жүргін бөлігіне ағымдағы жөндеу жүргізілді. Жұмыстар жалғасуда. Усть-Каменогорская көшесі (Шығыс кенті) бойынша Абай көшесінен 6-Линия көшесіне дейін жүргін бөлігі учаскесін кеңейту туралы шешім қабылданды. Жобаланатын жол учаскесінің ұзындығы 2 км, жобаның құны 1122,6 млн теңгені құрады. Қозғалыс жолақтарының саны 4, жүргін бөлігінің ені – 15 м. Мемлекеттік сатып алу конкурсы жарияланды. Осы жобаны іске асыру қалаға шығатын параллель көшелер бойынша көлік ағынын жеңілдетуге мүмкіндік береді,- деді жолаушылар көлігі және автомобиль жолдары бөлімінің басшысы Ерлан Уәлиев .
139,8 млн теңге сомасына 15 оң жақ бұрылысты орнатуға конкурс жарияланды. Ұшақтар, Суық бұлақ кенттерінің негізгі көшелеріне құм-қиыршықтас қоспасын себумен қоса, жүргін бөлікті жоспарлау бойынша жұмыстар басталды.
Сонымен қатар Семей – Талица 2 ауылдық елді мекеннің жалпы ауданы 116823 шаршы метр жолдарын ағымдағы жөндеуге 500,00 млн теңге, Қайнар ауылындағы ұзындығы 1,4 км жолды ағымдағы жөндеуге 42,5 млн теңге бөлініп, мердігер мекеме «Облшығысжол»ЖШС жұмыстарды бастады. 3 ауылдық елді мекендегі кірме жолды орташа жөндеуге, оның ішінде 2 елді мекенде «Ауыл – Ел бесігі» бағдарламасы бойынша (Мұрат ауылы, ұзындығы 5,5 км, Мұқыр ауылы, ұзындығы 3 км) және Жарқын ауылы, ұзындығы 7 км) мемлекеттік сатып алу конкурсы жарияланды. Жол жөндеу жұмыстары аяқталғаннан кейін, 2022 жылы қала көшелерінің 50,3 %-ы қанағаттанарлық жағдайда болады, асфальтбетон жабыны бары 87,6 %-ды, қиыршық тас жабыны бары 24,3 %-ды құрайтын болады.
Қала әкімі жұмыстың нақты мерзімін көрсетуді тапсырды. Жұмыс кестесі мақсатты индикаторларды көруге мүмкіндік береді, сондай-ақ мердігерлерден жұмысты белгіленген мерзімде аяқтауды талап етеді.
– Бір ай ішінде аяқтауға болатын жұмыстар жыл соңына дейін, желтоқсан айына дейін созылмауы тиіс. Бір апта ішінде жөндеу жұмыстары атқарылатын көшелердің нақты тізімін дайындауды, онда қандай жұмыс түрлері орындалатынын, қаржыландыру бойынша нақты есептеулерді көрсетуді тапсырамын. Тротуарларды, әсіресе жаяу жүргіншілер көп жүретін көшелерді жөндеуге ерекше назар аудару қажет, – деді Бақытжан Байахметов.
Ерлан АЙҚЫНҰЛЫ,
«Семей таңы»
