СОҒЫС АРДАГЕРІНЕ ПӘТЕР КІЛТІ ТАБЫСТАЛДЫ
Семей қаласының әкімі Бақытжан Байахметов Ұлы Отан соғысының ардагері Константин Гуслевті Ұлы Жеңістің 77 жылдығымен құттықтап, Қарағайлы шағын ауданынан пәтер кілтін табыстады. Отанымызды жанқиярлықпен қорғаған майдангерге ерлігі мен батырлығы үшін алғыс білдіріп, отбасына амандық, денсаулық және ұзақ өмір тіледі.
Константин Степанович Гуслев 1924 жылы 17 қыркүйекте Ресейде, Ставрополь өлкесі Апанасенков ауданы Дивное ауылында дүниеге келген. Туған жерінде он жылға жуық уақыт тұрып, Үржар ауданының Тасбұлақ ауылына қоныс аударады. 1942 жылы әскер қатарына шақырылады. Төрт ай жаяу әскер училищесінде оқып, бірден майданға аттанады.
1943 жылы Константин Степанович Курск шайқасына қатысып, Поныря селосында ауыр жараланады. Сауығып шыққаннан кейін Иркутск қаласында ІІМ-нің арнайы әскерінде қызмет етеді. Отты жылдардан кейін Алматы қаласында бір жыл бухгалтерлік курста білім алып, Үржар ауданына қайтып оралады.
Соғыстан аман оралған майдангер елдің экономикасын көтеру жолында тер төге еңбек етті. Константин Гуслев 1960 жылы Үржардан Долон ауылына қоныс аударып, осында бас бухгалтер болып өызмет етті. 1961 — 1999 жылдары Семияр совхозының алғашқы құрылған күнінен бастап оның таратылған уақытына дейін есепші болып жұмыс істейді. Сондай-ақ облыстық басқарманың төрағасы болды, ардагерлер кеңесін басқарды.
Майдангер соғыста көрсеткен жанқиярлық ерліктері үшін және бейбіт күндегі қажырлы еңбегі үшін мемлекеттік марапаттарға ие болды. Совхоз директоры болған уақытта шаруашылығы жақсы өндірістік көрсеткіштерге қол жеткізгені үшін «Өнім үздігі» медаліне ие болды. Сондай-ақ «Қарулы Күштерге 50 жыл», «Еңбек ардагері», «Астанаға 10 жыл», «Жуков медалі», «Ерлігі мен жанқиярлығы үшін» медальдарымен, Даңқ орденімен, Ұлы Отан соғысы орденімен, екі мәрте «Тың және тыңайған жерлерді игергені үшін» медалімен марапатталған.
Константин Степанович қала басшысына бағалы сыйлығы үшін алғыс айтып, барша жерлестерін Жеңіс күнімен құттықтады.
Айгерім СӘРСЕНҚАЛИҚЫЗЫ
