КӨШЕ ТАЗАЛЫҒЫНА БӘРІМІЗ ЖАУАПТЫМЫЗ
Жуырда Семей қаласының әкімі Бақытжан Байахметов қалалық әкімдіктің жауапты қызметкерлерімен бірге Мұхамедханов, Ибраев, Дулатов және Момышұлы көшелерін аралап, тазалық жағдайын тексеріп қайтты.
Рейд барысында шаһар басшысы алғашқы кезекте нысандардың аумақтары мен тротуарлардың қоқыстан тазартылуына, қаланың сәулеттік келбетін жақсартуға бағытталған жұмыстардың орындалу барысына назар аударды. Бұл орайда әлі де болса көңіл аударуды қажет ететін мәселелер бары анықталды.
Қалалықтардан шаһардың келбетін жақсартуға, тазалық шараларына қатысты ұсыныстар көптеп түседі. Мәселен, Момышұлы көшесіндегі тұрғындар аулаларындағы кәріз жүйелерін жабу қажеттігін айтады. Бұл өтініш алдағы уақытта орындалатын болады.
Қала басшысы ТҮКШ бөлімі мен «Зеленстрой» ЖШС мердігерлік ұйымына Орталық саябақты ретке келтіруді тапсырды.
Ал қалалық әкімдікке таяу орналасқан 6-шы гимназияның аумағындағы көгалдарды жаңарту қажет. Бұл мәселе жақын арада қарастырылатын болады.
Сонымен қатар Бақытжан Кәкенқажыұлы Қ.Мұхамедханов көшесіндегі жер үсті өткелінің жағдайына да назар аударды. Сынған шыныларды ауыстырып, жеделсатыны жөндеуді және басқа да мәселелерді шешуді жолаушылар көлігі және автомобиль жолдары бөліміне тапсырды. Сонымен қатар қала тұрғындарына аталған нысандарды ұқыпты пайдалану туралы өтініш білдіру қажеттігін де айтып өтті.
— Қазір апта сайын екі ай бойы жалғасатын дәстүрлі сенбіліктер өткізілуде. Сондықтан да барлық тұрғындарды қаланы тазалауға белсенді қатысуға және тиісінше оның жағдайын жақсартуға шақырамын, — деді қала әкімі.
Сонымен қатар бизнес нысандарының өкілдеріне іргелес аумақты тазалау және қадағалау туралы ескертулер берілді.
Ербол АЙҚЫНҰЛЫ,
«Семей таңы»
