РЕСПУБЛИКАЛЫҚ ТУРНИРГЕ ІРІКТЕУ ӨТТІ
Семей қаласындағы «Тарлан» спорт кешенінде Астана күніне орай қазақ күресінен «Қазақстан Барысы» республикалық турниріне «Шығыс Барысы» облыстық іріктеу жарысы өтті.
Жарыс шарты бойынша балуандардың жасы 18-ден асқан, салмағы 90 келіден жоғары болуы тиіс. Облыстық турнирдің І кезеңі ақпан айында ауылдық округтерде өткен болатын.
ІІ кезеңде аудандық, қалалық жарыстардың жеңімпаздары анықталды. Ал ІІІ кезеңде «Шығыс Барысы» облыс чемпиондары іріктелді. Олар біздің өңірді республикалық турнирде қорғайтын болады.
Жарыс басталар алдында Семей қаласының әкімі Бақытжан Байахметов сөз сөйлеп, балуандарға сәттілік тіледі.
— Қазақстан Президенті Қасым-Жомарт Кемелұлы Тоқаевтың жүлдесіне арналған «Қазақ Барысы» республикалық турнирі — айтулы әрі беделді жобалардың бірі. Бүкіл халық балуандарға қолдау көрсетіп отыр. Біздің Семей аймағынан шыққан чемпион жерлестеріміз Айбек Нұғымаров, Шалқар Жоламанов, Мұхит Тұрсыновты мақтан тұтады. Өткен жылғы республикалық турнирді жерлесіміз Дәурен Нұралинов жеңіп алды. Сіздердің жеңімпаз аға буын өкілдерінің даңқты дәстүрлерін лайықты жалғастыратындарыңызға сенемін, — деп атап өтті Бақытжан Байахметов.
Осы мүмкіндікті пайдалана отырып, Семей қаласының әкімі Бразилияда өткен XXIV жазғы Сурдлимпиада ойындарында дзюдодан 3-орын алған семейліктерге «Қалаға сіңірген еңбегі үшін» төсбелгісі мен 100 мың теңгенің қаржылай сертификатын табыстады.
«Шығыс Барысы» турниріне 19 балуан қатысты. Турнирде әсіресе ауыр салмақтағы спортшылардың белдесуіне жанкүйерлер ерекше қызығушылық танытты. Өйткені осындай турнирлерде олардан үлкен үміт күтіледі. Олар Айбек Қалибеков (133 кг), Қуаныш Рамазанов (131 кг), Еркебұлан Тұрмаханов (128 кг). Жарыстың ең жас және салмағы ең ауыр, 148 кг, қатысушысы Бородулиха ауданының спортшысы Ахмет Түсіпбеков болды. Алайда турнир соңында салмағы 100 келіден төмен спортшылар жеңімпаз атанды.
Турнир қорытындысы бойынша, бірінші орын мен «Шығыс Барысы» атағын Тарбағатай ауданының балуаны Елдар Бейсембаев жеңіп алды. 2-ші орынды семейлік Әсет Ахметжанов, 3-ші орынды Бесқарағай ауданынан қатысқан Мерей Қабдоллаев иеленді.
1-ші және 2-ші орын иегерлері осы жазда Нұр-Сұлтан қаласында өтетін республикалық қорытынды турнирде біздің өңіріміздің намысын қорғайтын болады.
Семей қаласы әкімінің баспасөз қызметі
