ЕЛ БОЛАШАҒЫН АЙҚЫНДАЙДЫ
ҚР Парламенті Мәжілісінің депутаты, AMANAT партиясы фракциясының мүшесі Ерлан Саиров 5 маусымда өтетін республикалық референдумның маңызы мен мәнін түсіндіру мақсатында Шығыс Қазақстан облысына келіп, мәслихат депутаттарымен кездесті.
— Мемлекет басшысы суперпрезиденттік республикадан қуатты Парламенті бар президенттік республикаға көшу туралы айтты. Сонымен бірге Жолдауды жүзеге асыру аясында Конституцияның 30-дан астам бабына өзгеріс енгізу және 20-дан астам заңды қабылдау ескерілген. Яғни, елдің құқықтық жүйесінің басым көпшілігі өзгеріске ұшырайды және азаматтар ол туралы білуі керек. Бұл азаматтардың иглігі үшін жасалып жатқандықтан, қоғам белсенділік танытуы тиіс,- деді Ерлан Саиров.
Кездесу барысында облыстық және қалалық мәслихат депутаттары сөз алып, сауалдарымен қатар өтініштерін де жеткізді. Халық қалаулылары жайылымдардың игілігін жергілікті жұрт емес, өзге өңірлерде тұратын қалталылар иемденіп отырғанын, шекаралық аудандарда жол, ауыз су сынды түйткілдердің толықтай шешімін таппай отырғанын айтты. Депутаттардың сөзінше, шет аймақтардағы 83 ауыл қазіргі уақытта қаңырай бастаған. Осы мәселелерді шешуді мейілінше жеделдету қажет деген тілектерін білдірді.
— Марқакөлді алып қарасақ та ондаған жыл ішінде тұрғындардың үдере көшкенін байқаймыз. Алайда, жергілікті жұрт, негізінен, малмен күнелтетіндіктен, жайылым тапшылығы әлі де аңғарылады. Елді мекен аумағында бос жер анықталса, құжат жүзінде иесі бар болып шығады. Сонда неліктен мұндай мәселе Заңнамаға сәйкес шешілмейді? Жер жекеменшікке берілуі тиіс деп ап-анық жазылған ғой, — деді Ұлан ауданынан келген аудандық мәслихат депутаттарының бірі.
Бұл ретте Парламент Мәжілісінің депутаты тұрғындардың заңнаманы өз пайдасына жарата алмай жүргендерін алға тартты.
— 2022 жылдың 1 қаңтарында жайылымға қатысты түзетулер мен өзгерістер енгізілді. Негізі, көп дүние жергілікті басшылық деңгейінде шешілуі қажет. Министрлік деңгейінде көтерілген мәселе еді, күні бүгінге дейін жүзеге асырылмай жатқаны жұмбақ. Кейде мұны аудан әкімдіктері қасақана қолдамаулары мүмкін, — деді Ерлан Биахметұлы.
Сонымен қатар ҚР Парламенті Мәжілісінің депутаты Ерлан Саиров демократия ұғымы сөз етілгенде әлеуметтік теңдік мәселесі қатар жүруі керектігін айтты. Оның сөзінше, қазіргі уақытта ел басшылығы мемлекеттік институттарды өздері жүзеге асыруларына еркіндік беруде. Мемлекет қазынасын һәм билікті қоғамға қайтару жоспары күн тәртібінен түспеуі тиіс.
— Еліміздегі экономикалық иеліктер санаулы адамдарға ғана қызмет етпеуі қажет. Республика көлемін алсақ, осы үрдіс оң шешімін тапқанның өзінде де қаржының әрі қарай дұрыс жұмсалуы екіталай. Қаражат адамдарға ғана емес, облыстардың аймақтарына да жетуі тиіс. Жұмыс сапарымен Зайсан, Тарбағатай аудандарына барғанымда жөнделмеген жол, тартылмаған интернет мәселесі әлі өзекті екенін байқадым. Шекаралық аудандарды дамытамыз деп жатқанымызбен, іске асып жатқаны шамалы. Катонқарағай, Тарбағатай, Зайсан аудандарынан 30 жыл ішінде тұрғындардың 60-65%-ы көшіп кеткен. Бұл жерде қаншама саяси қателіктер кеткені жасырын емес. Осы ретте сол саяси олқылықтарды мойындауымыз керек, — деді Ерлан Саиров.
Іссапар аясында Ерлан Саиров AMANAT партиясы Шығыс Қазақстан облыстық филиалында болып, бірқатар қоғамдық кеңес мүшелерімен, жастармен кездесіп, олардың жалпыхалықтық референдумға қатысты қойған сұрақтарына жауап берді.
Әлібек КЕМЕЛХАН,
«Семей таңы»
