Бұрынғы Үкімет басшысы Иманғали Тасмағамбетов Қазақстан гольф федерациясының президенті болып сайланды.
Қазақстан гольф федерациясының бас хатшысы Ербол Бұхарбаев федерация президиумы отырысының шешімімен Иманғали Тасмағамбетовтың Қазақстан гольф федерациясының президенті болып сайланғанын хабарлады.
Федерацияның құрметті президенті ретінде Нұртай Әбіқаев тағайындалды.
Айта кетсек, елімізде гольф федерациясы 2006 жылы құрылған. Содан бері спорттың осы түрінен астанада гольф клубы ашылып, «Ambassador’sCup» турнирі өткізіле бастаған. Оған Қазақстанның саяси қайраткерлері, шетелдік бизнес-қауымдастықтың және елімізде тіркелген дипломатиялық корпустың өкілдері қатысқан.
Гольф федерациясын ұзақ жылдар бойы Нұртай Әбіқаев басқарып келген еді.
«Ambassador’sCup» турнирінің бас демеушісі – «Алтын Қыран» компаниялар тобы.
Иманғали Тасмағамбетов — ҚР президенті Нұрсұлтан Назарбаевтың ең алғашқы көмекшілерінің бірі. Ол 1993 жылдан 1995 жылдар аралығында президент көмекшісі, қайта айналып, 1998-1999 жылдары президенттің бірінші көмекшісі болды. Өзінің саяси мансабында Білім және ғылым министрі, Қорғаныс министрі, Президент әкімшілігінің жетекшісі, Мемлекеттік хатшы, үш рет әкім (Атырау облысы, Алматы, Астана) және төрт рет әртүрлі премьер-министрлердің орынбасары, бір рет премьер-министр қызметін атқарды. Соңғы атқарған қызметі – Қазақстанның Ресейдегі төтенше және өкілетті елшісі.
