Биылғы жыл қазақстандықтар үшін дүрбелеңмен басталды. Қаңтар оқиғасы ел үшін татулық пен бейбітшілік маңызды құндылық екендігін тағы бір еске салып өтті. Халықтың ішкі бірлігінің мығым болуы арқылы ғана тұрақтылықтың сақталатынына көзіміз жетті. Қасіретті жағдайдың қайталанбауы үшін тонның ішкі бауындай бір болуымыз керектігін бәріміз санамызбен түйсіндік. Жаңа Қазақстанның бастауы — бүкілхалықтық референдум сол бірлігіміздің негізі болмақ.
Заң түзелмей, қоғамды өзгерту мүмкін емес. ҚР Президенті Қасым-Жомарт Тоқаевтың Қазақстанды жаңғыртуды Конституцияға өзгерістер жасаудан бастауын әділеттіліктің нышаны деп қабылдадым. Бұл өзгерістердің тарихи маңызы зор.
Мемлекет басшысы реформаларды қолға алған кезде Конституцияға енгізілетін өзгерістер мен толықтыруларды Парламент қарайды деп ойлаған едік. Өйткені 27 жыл бойы қалыптасқан дәстүр солай болатын. Алайда Ата Заңға өзгерістер мен толықтырулар енгізу жөнінде республикалық референдум өткізуді ұсыну арқылы халықты дүр сілкіндірді.
Тәуелсіздігімізді алғаннан бері елімізде түрлі өзгерістер болды. Қала да, дала да, саясат та, мәдениет те өзгерді. Ата Заңымыз да талай рет өзгерген… Бірақ бұл жолғы өзгерістің мәні де, маңызы да ерекше. Өйткені ол өзгеріс халықпен етене байланыста жасалады. Қарапайым халықтың пікіріне құлақ түретін өзгеріс. Отыз жыл бойы Парламент қарауында, депутаттардың ғана мақұлдауымен енгізіліп келе жатқан өзгертулерді енді халықтың өзі жасайды. Демек, Жаңа Қазақстан, әділ Қазақстан болады деген үміттеміз.
Біз мемлекеттігіміздің даму жолындағы жаңа кезеңге қадам басқалы тұрмыз.
Айбек НҰҒЫМАРОВ,
Семей қаласындағы көлік колледжінің директоры
