Ата Заңымызға референдум арқылы өзгерістер енгізуді қолдаймын. Өйткені бұл өзгерісті халық көптен күткен болатын. Демократия халық пікіріне негізделген Конституциядан басталады деп есептеймін.
Ата Заңымыз бұған дейін де талай рет өзгерген. Бірақ ешкім қарапайым халықтың пікірін сұраған жоқ. Парламент қарауына ұсынып, депутаттардың «бір ауыздан» мақұлдауымен өзгерте салатын. Мемлекет басшысы Қасым-Жомарт Тоқаев Ата Заңға енетін өзгерістерді халықтың таңдауына беріп, референдум өткізуді ұсынды. Ел Президенті өз ұсынысында: «Біз Екінші Республиканы бірге құрамыз, Жаңа Қазақстанды бірге өркендетеміз! Әр азаматқа бірдей мүмкіндік беретін әділ әрі дамыған мемлекет боламыз!»- деп атап өтті.
Ата Заңға енгізілетін өзгерістер Жаңа Қазақстанның бағыт-бағдарын айқындап береді. Бұл мақсатқа жету үшін биліктің халық үніне құлақ асып, ел пікірін ескеруі қоғам сенімін күшейтеді. Өйткені халық арасында дұрыс пікір, дұрыс әрекет болуы үшін заңымызды халық өзі қабылдауы керек деп ойлаймын.
Конституциялық реформалар — біздің мемлекетіміз үшін және әрбір азамат үшін маңызды процесс. Осы маңызды оқиғадан шет қалмайық. Референдумға қатысып, өзіміздің азаматтық ұстанымымызды білдірейік!
Ердос АХМАДИЕВ,
халықаралық дәрежедегі спорт шебері,
шаңғыдан ҚР құрама командасының мүшесі
