Жуырда АМАNАT партиясы филиалының Семей қалалық штабының мүшелері, қалалық мәслихат депутаттары Халықты жұмыспен қамту орталығында бас қосты.
Жиынға қатысушыларға «ҚР Конституциясына өзгерістер мен толықтырулар енгізу туралы» Қазақстан Республикасы Заңының жобасы таныстырылды. Штаб мүшелері мен қалалық мәслихат депутаттары сонымен қатар Қазақстандағы саяси реформалар, Конституцияға енгізілетін өзгерістерді түсіндіріп, қатысушылардың сұрақтарына жауап берді. Заңнамалық өзгерістерге жалпыхалықтық дауыс беру әрбір қазақстандықтың саяси бағытты қалыптастыруға қатысу құқығын және өз елінің болашақ тағдыры үшін жауапты шешім қабылдау құқығын айқындайтын тарихи әділеттілік актісі әрі Жаңа Қазақстанды құру жолындағы маңызды қадам екені атап көрсетілді.
Қалалық мәслихат депутаты Дариға Дайырова Негізгі Заңға ұсынылып отырған өзгерістер мен толықтырулар әрбір азаматтың құқықтары мен кепілдіктерін, қоғамдағы тұрақтылық пен бірлікті қорғауға бағытталғанын атап өтті. Бүкіл әлем үшін қиын-қыстау кезеңде қазақстандықтар бірігіп, азаматтық ұстанымын танытып, алдағы референдумға белсене қатысуы тиіс.
Жиында сондай-ақ Президент өкілеттіктерін шамадан тыс шоғырландырудан бас тарту, Парламентті күшейту, саяси партияларды тіркеу рәсімін оңайлату, сайлау процесін жаңғырту, жергілікті атқарушы және өкілетті билік органдары, азаматтардың іргелі құқықтарын қорғау, Конституциялық сот, сот және құқық қорғау жүйелерін жетілдіру, азаматтық қоғам институттары мен БАҚ рөлін күшейту, жерге иелік ету, Тұңғыш Президент мәртебесі бойынша саяси реформалардың ерекшеліктері мен бағыттары бойынша ҚР Конституциясының 31 бабына түзету және екі жаңа баппен толықтыру енгізу жөнінде кең көлемде түсінік берілді.
Жиын соңында мекеме қызметкерлері Мемлекет басшысының Ата Заңға өзгерістер мен толықтырулар енгізу үшін республикалық референдум өткізу туралы бастамасын қолдайтындарын айтып, 5 маусым күні өтетін саяси оқиғадан қалыс қалмай, ел болашағы үшін дауыс беретіндерін жеткізді.
Динара НҰРЛЫБЕКҚЫЗЫ,
«Семей таңы»
