Семей қаласына Қазақстанның Іскер әйелдер қауымдастығының делегациясы келді. Семейліктерді Абай облысының құрылуымен құттықтап, «Іскерлік байланыс» бағдарламасы аясында жергілікті әріптестерімен тәжірибе алмасу үшін қаламызға келген кәсіпкер әйелдер Абай музейінде баспасөз мәслихатын өткізді. Делегация құрамында Ақмола облысы мен Нұр-Сұлтан қаласының Іскер әйелдер қауымдастығының мүшелері, сондай-ақ Әйелдер күштері альянсы өкілдері бар.
Қауымдастық мүшелері Абай мұражайына Абайдың портретін сыйлады.
— Мен өзім Семей қаласының тумасымын, осында жұмыс бабымен келуіме мүмкіндік туғанына өте қуаныштымын. Семейдің облыс орталығы болатынын естігенде қуанышымызда шек болмады. Бұл — әрқайсымыз үшін өте маңызды оқиға. 1997 жылы мамырда Семей облыс орталығы мәртебесінен айырылды, сол кезде көп адамдар қаладан көше бастады, өйткені жұмыссыздық орын ала бастады. Маған да Алматыға қоныс аударуға тура келді. Бірақ, соған қарамастан, семейлік әріптестерім сияқты мен де туған қаламды ешқашан ұмытқан емеспін, ұмытпаймын және әр кез жан-тәніммен қолдаймын. Біз семейліктерді тамаша оқиғамен — орталығы Семей қаласы болған жаңа Абай облысының құрылуымен құттықтау үшін келдік. Осы оқиғаға орай біз Абайдың ешқандай бояу қолданылмай салынған суретін мұражайға сыйға тартқымыз келеді, – деді Ақмола облысы Іскер әйелдер қауымдастығының төрайымы Сайра Матайбаева.
Суретті салуға тек шегелер мен жіптер қолданылған. бұл ерекше картинаны жасауға бір ай уақыт кеткен екен.
Делегация құрамында 40 әйел бар. Баспасөз мәслихатында қауымдастық өкілдері семейліктерді конституциялық реформаларға қолдау білдіріп, алдағы референдумға белсене қатысуға шақырды.
Іссапар аясында кәсіпкер әйелдер семейлік әріптестерімен бірге «Қарағайлы» шипажайындағы IMOMS Семей жобасының зияткерлік-ойын-сауық іс-шарасын тамашалайтын болады. Одан соң Қоңыр әулие үңгіріне жол тартады.
Ерлан АЙҚЫНҰЛЫ,
«Семей таңы»
