Ақтоғай ауданында бұған дейін орысша аталып келген үш бірдей білім беру мекемесі қазақтың алып тұлғаларының атымен аталатын болды.
Бұл мектептердің іргетасы кеңес дәуірінде қаланған және ешқандай танымал адамдардың атын иеленбеген, деп хабарлайды Экспресс К.
Аудандық білім беру бөлімінің қызметкерлері көрнекті тұлғалардың есімдері берілген мектептерді толығымен таныстырып өтті.
«Біріншіден, Харьков орта мектебіне ұлы ғағартушы Ыбырай Алтынсариннің есімі берілді. Мектеп 1975 жылы ашылған. 69 оқушы білім алады. Екіншісі — Приреченск орта мектебі. Ол бұдан былай академик Қаныш Сәтбаевтың есімімен аталады. 1989 жылы салынған білім ордасында 77 бала оқиды. Үшіншіден, Агрономия орта мектебі Кеңес одағының батыры Талғат Бигелдиновтің атын иеленді. 1979 жылы ашылған бұл оқу ордасында да 77 бала білім алып жатыр», — деді аудандық білім бөліміндегілер.
Айта кетерлігі, мектептер атауы «Ұлы дала есімдері» жобасы аясында өзгертілген. Оқу ошақтарының бәрі де қазақ және орыс тілдерінде білім береді.
