1 маусым – Халықаралық балаларды қорғау күніне орай, Бородулиха ауданында да мерекелік шара ұйымдастырылды. Орталық алаңда жеткіншектерге арналып «Айналайын» фестивалінің гала-концерті өтті.
Айта кетерлігі, бұл фестиваль аудан көлемінде жыл сайын дәстүрлі түрде ұйымдастырылады. Ал фестивальда үздік атанғандар гала-концерте өнер көрсетеді.
Балаларымен бірге мерекелік шараны тамашала уға ата-аналар, аудан тұрғындары көп жиналды. Жүргізушілердің кіріспе сөзінен кейін кезегі аудан әкімі Ахметқали Нұрғожинге берілді. Ахметқали Ахашұлы барша балақайлар мен олардың ата-аналарын жаздың осынау шуақты мерекесімен құттықтап, ақжарма тілегін білдірді.
— Құрметті жерлестер, қымбатты балалар мен ата-аналар! Сіздерді 1 маусым — Халықаралық балаларды қорғау күнімен құттықтаймын! Балаларды қорғау күні — әлемнің түкпір-түкпіріндегі балаларға қуаныш сыйлайтын мейрам ғана емес, балалардың құқығын қорғап, оларға қамқор болуға үндейтін мереке. Сондықтан баласын бағына балаған ата-ана үшін де, бар тілегі мен елдік мұратын балалармен байланыстырған мемлекетіміз үшін де бұл мерекенің маңызы мен мағынасы зор.
Ата-ананың ең үлкен бақыты баласының жақсы азамат болып өсуі болса, ілгері ойлайтын мемлекет пен қоғамның да басты мақсаты – білімді де отаншыл ұрпақ тәрбиелеу. Биылғы жыл Президентіміздің бастамасымен Балалар жылы деп жарияланды. Кешенді іс-шаралар мен бастамалар балалардың құқығын қорғау мен әлеуетін арттыруға бағытталуда. Балалардың өмірі сапалы, болашағы жарқын болуы үшін мемлекет тарапынан барлық жағдай жасалуда, — деді аудан әкімі.
Мерекелік салтанатта жеңімпаздар балаларға мақтау қағаздары табысталды.
Балалар мерекесіне жиналған жұртшылықтың назарына жергілікті өнерпаздардың концерті ұсынылды. Аудандық Шығармашылық үйінің балғындары мен мектеп оқушыларының өнері көпшіліктің көңілінен шығып жатты. Әсіресе «Айгөлек» пен «Айналайын» топтарының спорттық биі жиналған көрерменді еріксіз тәнті етті.
Осылайша, Орталық алаңда өткен мәдени шара балаларымызды шат-шадыман күйге бөледі.
Ерлан АЙҚЫНҰЛЫ,
«Семей таңы»
