Мемлекеттік рәміздер – еліміздің ұлттық болмысын, дербестігі мен тәуелсіздігін бүкіл әлемге танытатын белгі. Бүгін тәуелсіз Қазақстанның мемлекеттік рәміздерінің қабылданғанына 30 жыл толып отыр.
1992 жылғы 4 маусымда Қазақстанның жаңа мемлекеттік рәміздері алғаш рет бекітілді. Содан бері 4 маусым Мемлекеттік рәміздер күні ретінде мерекеленіп келеді.
Мемлекеттік рәміздер тәуелсіздік нышаны ретінде ерекше құрметтеліп, оларға биік мәртебе берілген.
Мемлекеттік рәміздер күнін қазақстандықтар жыл сайын асқан патриоттық сезіммен мерекелейді. Екі жыл қатарынан әлемдік пандемияға байланысты Мемлекеттік рәміздер күніне арналған шаралар онлайн түрде ұйымдастырылған болса, биыл 30 жылдық мерейтой айрықша сән-салтанатпен аталып өтілмек. Еліміз бойынша 180-нен астам іс-шара ұйымдастырылады. Бұл туралы Орталық коммуникациялар қызметінде өткен брифинг барысында Мәдениет және спорт вице-министрі Нұрғиса Дәуешов мәлімдеді.
Биыл мемлекеттік нышандардың 30 жылдығына арналған бірыңғай логотип пен арнайы видеороликтер дайындалып өңірлерге таратылған. Мақсат – мемлекеттік рәміздердің құндылығын халық арасында кеңінен насихаттау.
— Маусымның 4-і күні Нұр-Сұлтан қаласындағы “Атамекен” этномемориалдық саябағындағы ең биік тұғырда Мемлекет басшысының қатысуымен көк туымыз көтеріледі. Сондай-ақ 4-і күні бүкіл республика бойынша Әнұранды орындау бойынша флешмоб өтеді. Тағы дәл сол күні републикалық патриоттар форумы өтеді. Автошеру де болады,- деді Нұрғиса Дәуешов.
Семей қалалық ішкі саясат бөлімінің берген мәліметтеріне сүйенсек, Семей қаласында да бірқатар мерекелік шаралар ұйымдастырылмақ. Мысалы, 4 маусым күні, яғни бүгін кешкісін ҚР Мемлекеттік рәміздерінің 30 жылдығына орай авто және велошеру өтеді. Қала жастары «Семей — Павлодар» автотрассасынан «Арена» спорт кешеніне дейінгі аралықты жүріп өтетін болады.
Осы күні өткізілетін барлық шаралардың мақсаты біреу – ұлттық рәміздеріміз — Туымыз, Елтаңбамыз бен Әнұранымызды ұлықтау арқылы жас ұрпақты отаншылдыққа тәрбиелеу.
Көгілдір түсті асқақ Туымыз бен ортасында шаңырақ бейнесіндегі алтын сәулелі күн орныққан Елтаңбамыз бүкіл әлемге Қазақстан Республикасы аталатын жаңа Тәуелсіз Мемлекеттің бейнесін паш етеді.
Азамат ЕРСАЙЫН,
«Семей таңы»
