— Сіздерді 4 маусым — Қазақстан Республикасының Мемлекеттік рәміздері күнімен шын жүректен құттықтаймын! Биыл — Мемлекеттік рәміздерімізге отыз жыл! Бұл дегеніміз — тәуелсіздіктің төртінші онжылдығына қадам басқан жас та жасампаз мемлекетіміз үшін мерейлі де межелі мереке. Егемендіктің айғағы саналатын – тұғырымызға орнаған рәміздеріміздің мәртебесі қашан да биік болары сөзсіз. Оларды құрметтеу – әр азаматтың қасиетті парызы, — деді.
Сондай-ақ, шаһар басшысы бүгінгі футбол мерекесінің маңыздылығын атап өтті.
«Бүгін – еліміздің 5 дүркін чемпионы атанған «Елім-ай» футбол клубының тарихи жеңістерінің куәсі болған «Спартак» стадионында үлкен футбол мерекесі. Семей — қазақ футболының отаны. Биыл туғанына 125 жыл толып отырған, даңқты жерлесіміз Мұхтар Омарханұлы Әуезовтің Семейдегі «Ярыш» командасында доп тепкені бәрімізге белгілі. Олай болса, осындай текті топырақтан Самат Смақов, Андрей Богомолов, Андрей Карпович сияқты талантты футболшылардың шығуы заңдылық. Бүгінде елімізде балалар футболын дамытуға баса мән беріліп келеді. Бүгінгі жас футбол жанкүйерлерінің арасынан болашақта кәсіби футболшылар шығуына тілектеспін», — дейді Бақытжан Баяхметов өзінің құттықтау сөзінде.
