ШҚО-дағы жоғары сынып оқушылары енді облыстағы кәсіпорындардың ақпараттық орталықтарына экскурсияға бара алады.
Экскурсияларды ұйымдастырудағы мақсат — оқушыларды өңірдегі ақпараттық орталықтардың жұмысымен, өндірістік процестің ғылыми негіздерімен таныстыру, цифрлық технологиялар саласындағы білімдерін кеңейту, Smart city бастамалары туралы кеңірек ақпарат беріп, цифрлық технологияларға деген қызығушылықтарын арттыру.
Бұл шаралар ШҚО әкімі Даниал Ахметовтің тапсырмасы бойынша Балалар жылы аясында ұйымдастырылып отыр. Экскурсиялар 19 сәуірде басталды. Әр сейсенбі және бейсенбі күндері күніне екі рет, сағат 10.00 және 15.00-де, 15 адамнан тұратын топтар кәсіпорындардың ақпараттық орталықтарына барады.
Нақтырақ айтқанда, оқушылар жас техниктер станциясында MATATALAB, CODRONE ZUMI сынды робототехникалық жиынтықтармен, «3D модельдеу», «Бағдарламалау», «Робототехника» үйірмелерінің жұмысымен және STEAM зертханасының, сондай-ақ Arduino зертханасының функционалымен, Д.Серікбаев атындағы Шығыс Қазақстан техникалық университетінде оқу орнының материалдық базасымен, «Прототиптеу және материалдарды өңдеу» орталығында соңғы үлгідегі 3D сканер мен 3D принтер жұмысымен, «Біріккен ЭнергоСервистік Компания» АҚ-да электр энергиясын ақылды есептеуіштермен жабдықтау бойынша кәсіпорынның, ведомствоаралық бірыңғай ситуациялық орталықтың, «OSKEMENCARD» электронды билеттеу жүйесінің жұмысымен танысу, бірегей «Алтын Алтай» мұражайын, Инвестициялық орталық пен Jastar Time инновациялық орталығын көру секілді мүмкіндіктерге ие болады.
ШҚО ақпарат орталығы
