Бұқтырма су қоймасының жағалауы алдағы уақытта Алакөл үлгісімен дамытылатын болады. ШҚО әкімдігінің мәліметіне сүйенсек, жаз кезінде Бұқтырма су қоймасының жағалауына, жергілікті тұрғындардан бөлек, республиканың түкпір-түкпірінен жұрт ағылады. Аймақ басшысы Даниал Ахметов: «Бұқтырмаға баратын туристерге жайлы жағдай жасалуы тиіс. Алакөлдегі сияқты мұнда демалыс орнының инфрақұрылымын дамыту қажет. Тиісті жұмыстар биыл басталады», — дейді. Облыс әкімінің айтуынша, демалыс базаларындағы түрлі нысандарға қойылатын талаптар қатаңдатылады. Жайсыз, ескі ғимараттардың орнына жаңаларын салу ұсынылып отыр. «Мәселен, қазір Алакөлде туристерге қолайлы жаңа қонақ үй кешені бой көтерді. Бұқтырмаға да осындай өзгеріс керек. Халыққа мұнда жету ыңғайлы болу үшін Осинов асуын айналып өтетін жол құрылысын аяқтау қажет», — деді облыс әкімі. Еске сала кетейік, Мемлекет басшысы Қасым-Жомарт Тоқаев былтыр 13 — 16 шілде аралығында төрт күндік қысқа мерзімді демалысын шығыстағы көрікті мекен Бұқтырма су қоймасы аумағында өткізген болатын.
Өз тілшіміз
