Қазақстан футболының отаны Семей қаласында Абай облысының құрылуына орай ұйымдастырылған футбол фестивалі аясында көптен күткен футбол ардагерлері — «Карпович достары» мен «Елім-ай жұлдыздары» арасында жолдастық кездесу өтті.
Ойынға қазақстандық футболшылар — жартылай қорғаушы, Қазақстан Республикасының чемпионы, Қазақстан Республикасы чемпионатының күміс және қола жүлдегері, «Қызыл-Жар СК» қазақстандық клубының бас бапкері Андрей Карпович, орталық қорғаушы, Қазақстанның ең атақты футболшысы — 6 дүркін чемпионы, 5 дүркін жүлдегері және Қазақстанның 4 дүркін үздік футболшысы Самат Смаков және жартылай қорғаушы, Қазақстанның 7 дүркін чемпионы Андрей Богомолов пен әлемдік және қазақстандық футболдың басқа да жұлдыздары қатысты.
Жолдастық кездесу Қазақстан Республикасы Мемлекеттік рәміздерінің 30 жылдығымен тұспа-тұс келді.
Семей қаласының әкімі Бақытжан Байахметов қала тұрғындары мен қонақтарын Мемлекеттік рәміздер күнімен құттықтап, жиналған барлық футбол жанкүйерлеріне алғысын білдірді.
— Еліміздің Мемлекеттік рәміздері біздің тарихи өткенімізді бейнелейді. Рәміздеріміз біздің бүгінгі мақсаттарымызды, ұмтылысымызды сипаттайды, әлемдегі қазақстандық қоғамның бейнесін жасайды. Мемлекет басшысы жүргізіп отырған саясат негізге алынған құндылықтарды жүзеге асырады. Бұл — ашықтық, бейбітшілік, еркіндік, тәуелсіздік және келісім. Сондықтан да Мемлекеттік рәміздер мемлекет азаматтары мен өскелең ұрпақ үшін үлкен мәнге ие. Нағыз патриот үшін Ту, Елтаңба — жай ғана рәміздер емес, бұл туған жеріміздің аспаны, көк аспанымыздағы күніміз, бұл — туған үйдің бейнесі, — деп атап өтті қала басшысы.
Қала басшысы сондай-ақ спорттың біздің өміріміздегі ерекше рөлін атап өтіп, Абай облысының құрылуына орай отанына келген ұлы футболшыларды — жерлестерімізді құттықтады.
— Дәл осы күні біз жеңістерімен еліміздің Мемлекеттік Туын жоғары көтерген спортшыларды футболдың отанында қарсы аламыз! 109 жыл бұрын «Ярыш» бірінші футбол командасында жазушы және ойшыл Мұхтар Әуезов ойнағаны әрбір семейлік үшін ерекше маңызды! Бұл құбылыс назар аудартады! Спорт — бұл өнер! Сонымен қатар спорт – үлкен еңбек! Бұл бұл еңбекке берілген баға — біздің мойындауымыз бен сүйіспеншілігіміз.
Баршаңызға Отанымыздың игілігі, бүкіл жер бетіндегі бейбітшілік жолында жоғары жеңістер мен жетістіктер тілеймін!- деді Бақытжан Байахметов.
Жолдастық кездесуден соң қала стадиондарында Қазақстан футболының аңыздары балалар үшін шеберлік сыныптарын өткізді.
Матч «Карповичтің достарының» пайдасына 4:5 есебімен аяқталды.
Әйгерім СӘРСЕНҚАЛИ,
«Семей таңы»
