ШҚО Санитариялық-эпидемиологиялық бақылау департаменті тұрғындарды ашық су қоймаларында лептоспироз, вирусты гепатит, ротовирустық инфекциялар, гельминтоз сияқты ауруларды жұқтыру қаупі барын ескертеді.
Мамандардың айтуынша, ауру қоздырғыштар суға науқастар және жануарлар арқылы келуі мүмкін.
Сондықтан санитариялық-эпидемиологиялық департамент мамандары су сапасына бақылау жүргізілетін халық жаппай шомылатын ресми орындарында ғана суға түсу қажеттігін айтады.
«Су айдындарындағы судың сапасы судың құрамы мен қасиеттеріне қойылатын гигиеналық талаптарды көздейтін санитариялық қағидалар шеңберінде бақыланады. «Шығыс Қазақстан облысының қалалары мен елді мекендерінің аумақтарын абаттандыру қағидаларының» 40-тармағына сәйкес, жағажайлар жергілікті атқарушы органмен контейнерлерді орналастыруға арналған арнайы алаңдармен жарақтандырылады», — делінген департаменттің баспасөз хабарламасында.
Айта кетейік, Шығыс Қазақстан облысында су объектілерінде көпшілік демалыс, спорт және туризмге арналған орындар облыс әкімдігінің 2021 жылғы 20 сәуірдегі № 124 қаулысымен Алтай ауданы, Үржар, Ұлан, Көкпекті, Катонқарағай, Бородулиха аудандары мен Өскемен қаласының аумағында белгіленген.
Талшын ҚАЛИАСҚАР,
«Семей таңы»
