Ақсуат ауданы әкімдігінің мәжіліс залында республиклық конференция болды. «Тұғыры биік Тарбағатай» спорт және өнер фестивалі бағдарламасына сай Қабанбай батырдың 330 жылдық мерейтойына арналып «Отан қорғау жолындағы батырлар ерлігі» тақырыбында республикалық ғылыми-тәжірибелік конференция ұйымдастырылды.
Оған зейнеткерлер, мектептердегі тарих пәнінің мұғалімдері, ақын-жазушылар, тарихшылар, өлкетанушылар, зиялы қауым өкілдері, журналистер, музей қызметкерлері және жастар қатысты.
Конференцияны Ақсуат ауданы әкімдігінің апарат басшысы Көнекбаев Тілеуқабыл алғы сөз сөйлеп ашып, аудан әкімі Асхат Смаиловтың конференцияға қатысушыларға арнаған Алғыс хатын оқып берді.
Жәнтікей ауылының тұрғыны, Тарбағатай ауданының Құрметті азаматы Жамбыл Жұманбаев жас ұрпақты бабалар ерлігі рухында тәрбиелеу жөніндегі ой-пікірлерін ортаға салды.
Конференцияда мемлекет тарихы институтының бас ғылыми қызметкері, педагогика ғылымдарының кандидаты Қалиев Жабай Нұрмақұлы, осы оқу орнының жетекші ғылыми қызметкері, тарих ғылымдарының кандидаты, профессор Еңсенов Қанат Әлібекұлы Л.Н.Гумилев атындағы Еуразия Ұлттық университетінің профессоры, тарих ғылымдарының докторы Тұрсынхан Зәкенұлы, Сүлеймен Демирел атындағы университеттің профессоры, тарих ғылымдарының докторы (PhD) Дүйсенәлі Әбділәшімұлы және басқалар «Қабанбай батыр – қолбасшы, мәмлегер және мемлекет қайраткері», «Қабанбай батыр ерліктерінің фольклорлық деректерде баяндалуы», «Қытай архивтерінде сақталған қазақ хандары мен сұлтандарының хаттары», «Шорға шайқасының тарихы», «Қазақ батырлары мінген тұлпарлар», «Қабанбай батырға қатысты зерттеулер мен экспедиция жұмыстарының қорытындылары» және басқа тақырыптарда баяндама жасады.
