Италияның Рим қаласында өткен 17 жасқа дейінгі жасөспірімдер арасындағы еркін күрестен әлем чемпионатында шығысқазақстандық балуан Дарын Әскербек жеңіс жалауын желбіретіп, әлем чемпионы атанды. Дарын Әскербек аталған спорт түрінен алғаш рет чемпион атанып отыр. Шығысқазақстандық спортшы әлем чемпионатында 55 келіге дейінгі салмақта бақ сынасты.
Жартылай финалда Әскербек Германия өкілі Яннис Ребхольцтан басым түсті. Финалға шығар алдында Хусанбой Усмановпен (Өзбекстан) және Арен Серобянмен (Армения) күш сынасып, финалға жолдама алды. Ал финалда АҚШ спортшысы Джаксен Патрик Форрестомнан басым түсті. Қос мықтының арасындағы белдесуде отандасымыз 11:10 есебімен жеңіске жетті.
— Біздің спортшыларды алда әлі талай жеңістер күтіп тұрғанына сенімдімін. Жас спортшы мен оның жаттықтырушысын осынау жеңісімен және әлем чемпионы атануымен шын жүректен құттықтаймын. Алдағы уақытта да биік шыңдарды бағындырып, жаңа жеңістерге жете беруіне тілектеспін! – деп құттықтады чемпионды ШҚО әкімі Даниал Ахметов.
Жас палуанды ҚР Парламенті Мәжілісінің депутаты Ерлан Саиров та фейсбук әлеуметтік желісіндегі жеке парақшасында құттықтады.
«Міне, ағайын, ақ түйенің қарны жарылған күн болды. Италияда өтіп жатқан еркін күрестен әлем чемпионатында, ШҚО Тарбағатай ауданы Ақжар селосы Б.Сайханов атындағы спорт мектебінің түлегі, Берік Алимовтің шәкірті Дарын Әскербек әлем чемпионы атанып, алтын медальды өңіріне тақты. Құтты болсын!» — деп жазды Ерлан Бияхметұлы.
Жеңімпазды біз де құттықтаймыз!
Талшын ҚАЛИАСҚАР,
«Семей таңы»
