Абай облысында өрт сөндіру кезінде жасы небары 36 жастағы азамат қаза тапты.
Өзінің қызметтік борышын атқарды десек те , көңілде күпті ой көп. Бұл оқиға нені көрсетті?
Біз өрт пен су сияқты тілсіз жауға қарсы тұруға, кездейсоқ табиғат апаттарына дайын емес екенбіз. Елдегі төтенше жағдайға байланысты өрт сөндіру қызметіне көмекке полиция қызметкерлері де жіберілді. Демек, осы салаға мамандар жетпейді деген сөз.Ендеше арнаулы оқу орындарына грантты көптеп бөлу қажет деп ойлаймыз.
Соңғы жылдары мұғалімдер мен дәрігерлердің еңбекақыларын көтеріп жатырмыз, ал қызметтері қауіпке толы өрт сөндірушілердің, полиция қызметкерлерінің еңбекақысы аз емес пе?
Оларды баспанамен қамту мәселесі қандай деңгейде?
2017 жылы ЭКСПО өткен кезде есеп шоттарынан рұхсатсыз алынған полиция және әскери қызметшілердің зейнетақы қорындағы қаржылары қандай мақсатқа жұмсалды? Бұл әділдік пе? Қайтарып беру керек деп есептейміз.
Қапияда қаза тапқан азаматтың артында қара жамылып жесірі мен 5 баласы қалды. Қызметтік борышын орындау кезінде көрсеткен батылдығы мен жанқиярлық ерлігі үшін азаматтық қорғау сержанты Айдос Ерұланұлы Тоғызбаев қаза тапқаннан кейін ІІІ дәрежелі «Айбын» мемлекеттік наградасына ұсынылды. «Азия» фирмасы қайтыс болған азаматтың жанұясына 3 бөлмелі пәтер сыйлады.
Оттың ортасында Айдос сияқты талай азаматтарымыз тілсіз жаумен арпалысып жүр. Ал бізде марапат , пәтер алу үшін міндетті түрде қаза болу керек сияқты. Тіпті марқұм қайтыс бола сала дүние, марапат туралы айтудың өзі құлаққа біртүрлі естіледі екен. Өрт сөндіру кезінде ерлік көрсеткен барлық азаматтар елеусіз қалмауы керек деп есептейміз. Тамыр –таныстық емес, ерлік басты критерий болуы керек.
Өкінішке орай пәтер мен орден бес балаға әкенің орнын алмастыра алмайды…
