Әр халықтың бойында ықылым заманнан бері қалыптасып, оны өзгелерден даралап тұратын, тек өзіне ғана тән қасиеттері болады. Біздің халқымыздың сондай ерекшеліктерінің бірі — үлкенді сыйлау, оның сөзіне құлақ асу. Қазақ қарты жасына лайық ауызы дуалы, сөзі берекелі, ісі тыңғылықты, ойы терең, ақылы телегей теңіз болып келеді. Өмірден көрген-түйгендері көп аға ұрпақтың еңбек жолы мен жинақтаған тәжірибесі – жастарға үлгі. Бүгінде қоғам өміріне араласып жүрген белсенді қарияларды көргенде олардың қаншалықты бақытты екенін түсінесің.
Жыл сайын қазан айының бірінші жұлдызында еліміз Халықаралық қарттар күнін атап өтеді. Бұл – даналық пен мейірімнің мерекесі. Бұл – аға буынға біздің сүйіспеншілігіміз бен қамқорлығымыз, ілтипатымыз қажет екенін бәрімізге тағы бір мәрте аңғартатын мереке.
Қарттар күні қарсаңында Глубокое аудандық Аналар кеңесінің төрағасы Р.Әділбаева мен аудандық Достық үйі басшысының міндетін атқарушы Э.Тебисованың ұйымдастыруымен биылғы жылы да қариялар Өскемен қаласындағы драма театрына барып қайтты. Аудан ардагерлері — Андрей Ақышев пен Нәзира Советқанқызы, Күлзиға Үркімбаева мен Нұрғайни Мусина және Рымбек Төребекұлы театр әртістерінің ұлы композитор Шәмші Қалдаяқовтың шығармашылық қызметі туралы музыкалық қойылымын тамашалады. Қариялар ән тыңдап қана қоймай, өздері де әртістермен қосыла ән шырқады.
Спектакльден жақсы әсер алып, өздеріне деген ілтипатты сезініп, рухани тұрғыда демалып шыққан қарттарымыз алғыстарын да жеткізіп жатты.
Иә, қарттарды қуанту үшін көп нәрсе қажет емес. Оларға біздің мейіріміміз бен қамқорлығымыз керек. Қарияларға құрметпен қарау – кісіліктің белгісі, қамқорлық жасау — адамгершілік парызымыз.
Зарина КӘП,
«Семей таңы»
