15 қараша — еліміздің қаржыгерлерінің, экономиканың нақты секторында еңбек ететін қызметкерлердің кәсіби мерекесі.
Бұл күннің мереке ретінде таңдалуы бекер емес, 1993 жылдың 12 қарашасында Қазақстан Республикасының Тұңғыш Президенті Ұлттық валюта – теңгені айналымға енгізу туралы Жарлыққа қол қойды. Дәл сол жылы 15 қарашада елімізде алғаш рет ақша реформасы жүргізілді, қазақ даласының ұлы тұлғалары — әл-Фараби, Абылай хан, Абай, Жамбыл, Сүйінбай, Шоқан бейнеленген алғашқы теңгелер жарыққа шығып, айналымға түскені тәуелсіздіктің шынайы көрінісі болды. Теңгенің айналымға енгізілуі — біздің жас тәуелсіз мемлекетіміздің жылнамасындағы ең маңызды оқиғалардың бірі. Бұл еліміздің тәуелсіздігін нығайту жолындағы түбегейлі әлеуметтік-экономикалық реформаларды жүргізу үшін қажетті тарихи қадам болды.
2017 жылғы 31 қазанда ҚР Үкіметінің №689 қаулысымен 15 қараша — Ұлттық валюта — теңге күні әрі қаржыгерлердің кәсіби мерекесі болып болып бекітілді.
Тәуелсіздіктің алғашқы жылдарынан бастап қаржыны мемлекеттік басқаруда, салық және қазынашылық жүйесінде айтарлықтай жетістіктерге қол жеткіздік. Елдегі құндылықтарды есептеу, жинақтау, өңдеу құралы ретінде теңгенің маңыздылығы жылдан-жылға артып келеді. Халықтың төл теңгемізге деген көзқарасы, сенімділігі артты. Банктерде теңгелік салымдардың мөлшері бірнеше есе өсіп, шетелдік валюта салымдары төмендеп келеді. Теңгенің төлем қабілетін қамтамасыз ету бойынша нақты шаралар облыс көлемінде де қолға алынуда. Бағаны тұрақтандыру, азық-түлік қорын құру, жергілікті тауар өндірушілерді кеңінен қолдау, көтерме-бөлшек базарлар жүйесін кеңейту, жергілікті бюджет қаражаты есебінен шағын және орта бизнесті қаржыландыруға көп көңіл бөлінуде.
Осындай келелі істерді жүзеге асыруда қаржыгер мамандығының қаншалықты маңызды екендігі бәрімізге мәлім. Бұл — үлкен жауапкершілік пен біліктілікті талап ететін жауапты қызмет.
Бүгінгі күні қайта құрылған Абай облысының бүкіл қаржы жүйесінде бюджет процесінің, салық, кеден және банк заңнамасының қыр-сырын шебер бағдарлай отырып, батыл іс-қимылдар жасауға қабілетті білікті қаржы мамандары жұмыс істеп отыр деген сенімдемін. Облысымыздың қаржы қызметкерлерінің алдында тұрған міндеттер жай ғана күрделі емес. Ол міндеттер бізден жоғары кәсібилікті, стандартты емес шешімдерді, барлық жинақталған тәжірибеміз мен білімдерімізді орынды пайдалануды талап етеді.
Халықтың өмірін жақсарту облысты дамытудың бірінші кезектегі мақсаты болып табылатынын атап өткен жөн. Сондықтан ақшалай ресурстарды сауатты жоспарлау және бөлу, оларды жұмсаудың тиімділігін басқару, барлық деңгейдегі бюджеттер үшін кіріс көздерін дамыту және қаржылық жағдайды бақылауда ұстау облысымыздың қаржы қызметкерлерінің ел алдындағы азаматтық борышы деп есептеймін.
Құрметті қаржыгерлер, қымбатты әріптестер, ардақты ардагерлер!
Абай облысы бойынша тексеру комиссиясының атынан және жеке өз атымнан Сіздерді келе жатқан кәсіби мерекелеріңіз — Қаржыгерлер күнімен құттықтаймын! Сіздердің әрқайсыларыңыздың адал еңбектеріңіз облысымыздың және тұтастай алғанда бүкіл Қазақстан Республикасы экономикасының қаржылық әлеуетін дамытуға және нығайтуға қосар үлестеріңіз деп білемін. Сіздерге шын жүректен мықты денсаулық, жемісті еңбек, кәсіби табыс пен тұрақтылық тілеймін!
Н.Б.ТАУШОВ,
Абай облысы бойынша тексеру комиссиясының төрағасы
