11 желтоқсан күні ҚР Ақпарат және қоғамдық даму вице-министрі Данияр Қадыров Абай облысына келіп, Мұхтар Әуезов атындағы педагогикалық колледж қабырғасында аймақ жұртшылығымен кездесті.
Жадыра ТӨЛЕГЕНҚЫЗЫ,
«Семей таңы»
Вице-министр Данияр Қадыров кездесу барысында қызметінің негізгі бағыттары туралы айтып, БАҚ, үкіметтік емес ұйымдар мен жастарды қолдау тұрғысынан жүзеге асырылып жатқан мемлекеттік шараларға тоқталды. Вице-министрдің айтынша, қазір БАҚ туралы жаңа заң, қоғамдық бақылау және петиция туралы заңдар Парламентте талқылану үстінде. «Қоғамдық бірлестіктер туралы» заңға өзгерістер мен толықтырулар енгізілуде. Данияр Қадыров сондай-ақ «Мемлекеттік жастар саясаты» туралы заңға енгізілген өзгерістер мен толықтырулар Сенат пен Мәжілісте мақұлданғанын айтты. Атап айтсақ, бұған дейін 14-29 жас аралығындағы азаматтар жастар санатында болса, өзгерістерге сәйкес, енді бұл көрсеткіш 14-35 жас аралығын қамтитын болады.
— Ақпарат және қоғамдық даму министрлігі құзыреттілігіне ақпарат саласы, азаматтық қоғам, дін, гендерлік теңдік, отбасы институты мәселелері және жастар саясаты кіреді. Біздің министрлік бұл салаларды бақыламайды, дамуына жағдай жасайды. Сіздермен сұхбаттаса отырып, нормативтік-құқықтық актілер әзірлейміз. Қазіргі таңда БАҚ туралы жаңа заң Парламентте талқылану үстінде. Бұл тұрғыда құзыретті мемлекеттік органдармен, азаматтық қоғаммен, ҮЕҰ, сарапшылармен онлайн тікелей эфирлер ұйымдастырып, пікірлерін тыңдаудамыз. Қазақ тілді контентті, бағдарламаларды көбейту мақсатында жүйелі жұмыстар жүргізілуде. Қазір аудиторияның көзқарасы өзгеруде. Әлеуметтік желілердегі халықтың өтініш-тілектерін де назарға алып отырамыз. Екінші бағыт — азаматтық қоғамды, яғни волонтерлер қозғалысын, түрлі қоғамдық қорларды, үкіметтік емес ұйымдардың жұмысын дамыту. Қазір Мәжілісте қоғамдық бақылау және петиция туралы заңдар қаралып жатыр. Сонымен қатар «Қоғамдық бірлестіктер туралы» заңға өзгерістер мен толықтырулар енгізілуде. Өздеріңіз білетіндей, қоғамдық бірлестік ашу үшін оның құрамы он адамнан кем болмауы керек. Әлемдік тәжірибеге сүйеніп, бұл көрсеткішті екі адамға дейін азайтып отырмыз,- деді Данияр Қадыров.
— Жастарды тұрғын үймен, жалдамалы тұрғын үймен қамту бойынша жергілікті әкімдіктермен, «Отбасы банк» АҚ-мен бірлесіп жұмыстар жүргізудеміз. Сонымен қатар, өздеріңіз білетіндей, Президент тапсырмасымен әйелдер үшін зейнеткерлік жас деңгейі 2028 жылға дейін 61 жас деңгейінде белгіленеді. 2023 жылдың 1 қаңтарынан бастап бала күтімі бойынша жәрдемақы төлеу мерзімі бір жылдан бір жарым жылға дейін ұзартылады,- деді вице-министр.
Кездесу барысында Данияр Қадыров қатысушылардың сұрақтарына жауап берді.
— Жоғарыда БАҚ туралы жаңа заң Парламентте қаралып жатқанын айтып кеттіңіз. Журналистер баспана алуда немесе әлеуметік қолдауда болсын үнемі қалыс қалып жатады. Осы мәселені ескерсеңіз екен. Екіншіден, жалақы тағайындалғанда журналистердің тәжірибесі мүлде ескерілмейді. Жаңа келген жас маман да, бірнеше жыл істеген тәжірибелі қызметкер де бірдей жалақы алады. Журналистердің мәртебесін қарастыруда осыған мән берілсе,- деді жергілікті журналистердің бірі. Вице-министр ұсыныстардың орынды екенін атап өтіп, басшылыққа жеткізетінін айтты.
“Айша бибі” қазақ мәдени ұлттық орталығының төрайымы Айман Боқбасарова қазақтың қолөнерін дамытуға мемлекеттік деңгейде қолдау көрсетілсе деген тілегін білдірді.
— «Айша бибі» қазақ-мәдени ұлттық орталығын құрғаныма жиырма жылдан асты. Қазір елімізде қазақтың қолөнерін дамыту ісі бәсеңдеп тұр. Көрші Өзбекстан, Тәжікстан секілді мемлекеттерде бұл салаға мемлекеттік деңгейде қолдау бар. Деректерге сүйенсек, өткен ғасырда Семей облысынан ең көп қолөнер шебері шыққан. 248 ұлттық шебер болған екен. Қазір қаламызда 50 шақты ұлттық шебер бар. Мен он жылдан бері қалада қолөнер шеберлерінің көрмесін ұйымдастырып келемін. Қолөнер де ұлттық өнердің ажырамас бөлігі. Сондықтан мемлекеттік деңгейде қолдау керек. Мәдени орталықтардың жетекшілеріне аз да болса жалақы төленсе деймін. Зейнеткерлік жасқа жеттім, жалақы төленбегендіктен, орнымды басатын адам таппай отырмын,- деді Айман Боқбасарова.
— Елімізде ұлттық қолөнер шеберлері өте көп. Әр өңірдің, әр ауылдың атақты шеберлері бар. Негіз,і бұл сұрақ Мәдениет және спорт министрлігіне қатысты екен. Әріптестеріме жеткіземін. Мен өзім бірнеше жыл Моңғолияда қызмет істедім. Ондағы қазақтарда ұлттық қолөнер өте жақсы сақталған. Дегенмен домбыра аспабын, киіз үйді жасауда Қазақстанның шеберлеріне жетпейді. Иә, дұрыс айтасыз, еліміздегі қолөнер шеберлерін шоғырландыру керек, жағдай жасау қажет.,- деді вице-министр.
Облыстық ардагерлер кеңесінің төрағасы Мұратқазы Әлин, қаржыландырудың жетіспеуінен, ұйым көп жұмыстарға араласа алмайтынын айтса, «АМиДО» жастар ұйымының жетекшісі Эльзира Жүнісова әлеуметтік желілерде жалған ақпараттар таратып, сенсация іздейтін блогерлер мен журналистерге шара қолдануды өтінді.
Данияр Рамазанұлы кездесуден соң азаматтарды жеке сұрақтары бойынша қабылдады.
